ടൊവിനോ തോമസും മംമത മോഹന്ദാസും കേന്ദ്ര കഥാപാത്രങ്ങളായി എത്തുന്ന “ഫോറന്സിക്” ചിത്രത്തിന് ആശംസകളുമായി നടന് മാധവന്. മംമത മോഹന്ദാസിനും ടൊവിനോക്കും ഈ സ്പെഷ്യല് മൂവിക്കായി എല്ലാവിധ ആശംസകളും എന്നാണ് മാധവന് ട്വീറ്റ് ചെയ്തിരിക്കുന്നത്. ചിത്രത്തിന്റെ ട്രെയ്ലറും ട്വീറ്റിനൊപ്പം ചേര്ത്തിട്ടുണ്ട്. മാധവന് നന്ദി പറഞ്ഞ് മംമത ട്വീറ്റ് പങ്കുവച്ചിട്ടുണ്ട്.
അഖില് പോള്, അനസ് ഖാന് എന്നിവര് ചേര്ന്ന് സംവിധാനം ചെയ്യുന്ന ഫോറന്സിക്കില് സാമുവല് ജോണ് കാട്ടൂക്കാരന് എന്ന ഫോറന്സിക് ഉദ്യോഗസ്ഥനായാണ് ടൊവിനോ വേഷമിടുന്നത്. റിതിക സേവ്യര് ഐപിഎസ് എന്ന കഥാപാത്രമായാണ് മംമ്ത എത്തുന്നത്. ബര്മ കോളനിയിലെ കില്ലറെ തേടിയുള്ള അന്വേഷണമാണ് ചിത്രം. സൈജു കുറുപ്പ്, ധനേഷ് ആനന്ദ് ഗിജു ജോണ്, റേബ മോണിക്ക ജോണ് തുടങ്ങിയവരാണ് ചിത്രത്തിലെ മറ്റു താരങ്ങള്.
ചിത്രത്തിന്റെ തിരക്കഥ എഴുതിയിരിക്കുന്നതും അഖില് പോളും അനസ് ഖാനും ചേര്ന്നാണ്. സിജു മാത്യു, നെവിസ് സേവ്യര് എന്നിവരുടെ ജുവിസ് പ്രൊഡക്ഷന്സും രാജു മല്യത്തിന്റെ രാഗം മൂവീസും ചേര്ന്നാണ് ചിത്രം നിര്മിക്കുന്നത്. അഖില് ജോര്ജ്ജാണ് ചിത്രത്തിന്റെ ഛായാഗ്രഹണം നിര്വ്വഹിക്കുന്നത്. ജെയ്ക്സ് ബിജോയ് ആണ് സംഗീതം.