മതവിശ്വാസി ആയി അറിയപ്പെടാന് അല്ല, സ്പിരിച്വല് ആയി അറിയപ്പെടാനാണ് ആഗ്രഹിക്കുന്നത് ബോളിവുഡ് നടി വിദ്യാ ബാലന്. പിടിഐയുമായുള്ള അഭിമുഖത്തിലാണ് വിദ്യ ഇക്കാര്യം പറഞ്ഞത്. മതവിശ്വാസികളെന്ന് വിളിക്കുന്നതില് നിന്ന് ഒഴിഞ്ഞുമാറുന്ന ധാരാളം പേരെ തനിക്കറിയാമെന്നും അവരില് ഒരാളാണ് താനെന്നും വിദ്യ പറയുന്നു. വിദ്യയുടേതായി അടുത്തിറങ്ങിയ മിഷന് മംഗളില് ദൈവഭക്തയായ ഐഎസ്ആര്ഒ ശാസ്ത്രജ്ഞയുടെ വേഷത്തിലായിരുന്നു വിദ്യ.
“മതം ഇന്ന് വ്യാഖ്യാനിക്കപ്പെടുന്ന രീതിയില് ഒരു പ്രശ്നമുണ്ടെന്ന് തോന്നുന്നു. ഞാന് മതവിശ്വാസിയാണെന്ന് പറയാന് ആഗ്രഹിക്കുന്നില്ല. ഞാന് എപ്പോഴും സ്പിരിച്വല് എന്ന് അറിയപ്പെടാനാണ് ആഗ്രഹിക്കുന്നത്. മതം എന്നത് അസഹിഷ്ണുത എന്നതിന്റെ പര്യായമായി മാറിയതിനാല് മതം ഒരു നെഗറ്റീവ് അര്ത്ഥമായിത്തീര്ന്നു. അല്ലെങ്കില് അങ്ങനെ ഒരു അര്ത്ഥം നേടിയെടുത്തിരിക്കുന്നു. എന്നാല് ശാസ്ത്രവും മതവും പരസ്പരം മാറി നില്ക്കേണ്ടതില്ല എന്നാണ് എനിക്ക് തോന്നുന്നത്.” വിദ്യാ ബാലന് പറഞ്ഞു.
Read more
മംഗള്യാന് ദൗത്യത്തിന്റെ കഥ പറയുന്ന ചിത്രമാണ് അക്ഷയ് കുമാര് നായകനായെത്തിയ മിഷന് മംഗള്. മലയാളികളുടെ പ്രിയ താരം നിത്യ മേനോന്റെ ബോളിവുഡ് അരങ്ങേറ്റ ചിത്രം കൂടിയാണ് മിഷന് മംഗള്. ഐഎസ്ആര്ഒയിലെ ഒരു സാറ്റലൈറ്റ് ഡിസൈനറായാണ് നിത്യ ചിത്രത്തില് വേഷമിടുന്നത്. നിത്യ മേനോന് പുറമെ വിദ്യാ ബാലന്, തപ്സി പന്നു, സൊനാക്ഷി സിന്ഹ, ക്രിതി കുല്ഹരി, ശര്മ്മന് ജോഷി തുടങ്ങിയവരും ചിത്രത്തില് അഭിനയിച്ചിട്ടുണ്ട്. ചിത്രം ജഗന് ശക്തിയാണ് സംവിധാനം ചെയ്തിരിക്കുന്നത്.