ചുരുങ്ങിയ സമയത്തിനുള്ളിൽ കന്നിപ്പോരാട്ടത്തിൽ ഉജ്വല വിജയം നേടി തമിഴ്നാട്ടിൽ സർക്കാർ രൂപീകരിക്കാൻ ഒരുങ്ങുകയാണ് നടൻ വിജയ്. താരത്തിന്റെയും ഭാര്യയുടെയും വിവാഹ മോചന വാർത്ത ശ്രദ്ധേയമായിരുന്നു. ഒരു നടിയുമായി വിജയ്ക്കുള്ള ബന്ധമാണ് വേർപിരിയലിന് കാരണമെന്ന് വിജയയുടെ ഭാര്യ സംഗീത വിവാഹമോചനം ആവശ്യപ്പെട്ട് നൽകിയ നോട്ടിസിൽ വ്യക്തമാക്കിയിട്ടുണ്ട്. ഇതിനിടെയായിരുന്നു തിരഞ്ഞെടുപ്പിൽ വൻവിജയം വിജയ് നേടിയത്.
മേയ് 4നാണ് തിരഞ്ഞെടുപ്പ് ഫലം വന്നത്. വിജയ് നേതൃത്വം നൽകുന്ന ടിവികെ നൂറിലധികം സീറ്റുകൾ നേടി തിളക്കമേറിയ വിജയം നേടിയ അതേ ദിവസം തന്നെയായിരുന്നു നടി തൃഷയുടെ ജന്മദിനം. പിറന്നാൾ ദിനത്തിൽ ഇരട്ടിമധുരമായി വിജയ്യുടെ തിരഞ്ഞെടുപ്പു വിജയം എന്ന രീതിയിലാണ് ആരാധകരും മാധ്യമങ്ങളും ആ വിജയത്തെ ആഘോഷിച്ചത്. രാധിക ശരത്കുമാർ, ചാർമി, കസ്തൂരി ശങ്കർ തുടങ്ങിയ സെലിബ്രിറ്റികളടക്കം തൃഷയെ അഭിനന്ദിച്ച് രംഗത്തെത്തിയിരുന്നു. എന്നാൽ ഇപ്പോഴിതാ വിഷയത്തിൽ വേറിട്ട നിലപാട് പരസ്യമാക്കി ഗായത്രി ശങ്കർ രംഗത്തെത്തിയിരിക്കുകയാണ്.
വിജയെ പിന്താങ്ങുക മാത്രമല്ല ആരോപണം നേരിടുന്ന നടിയെ ആഘോഷിക്കുകയും ചെയ്യുന്നവരെ രൂക്ഷമായി വിമർശിക്കുകയും ചെയ്തുകൊണ്ട് നടി ഗായത്രി ശങ്കർ രംഗത്തെത്തിയത്. ഒരു നടന്റെ വിവാഹേതര ബന്ധം ആഘോഷിക്കുന്ന ഈ കൂട്ടം ഇക്കാര്യം ഒരു നടിയുടെ ഭാഗത്തു നിന്നായിരുന്നു ഉണ്ടായിരുന്നതെങ്കിൽ സമാനപ്രതികരണം നടത്തുമോ എന്നാണ് ഗായത്രി ഉയർത്തുന്ന വാദം.
ഗായത്രി ശങ്കറിൻ്റെ വാക്കുകൾ
Read more
പങ്കാളിയുമായി വേർപിരിയലിൻ്റെ വക്കിൽ നിൽക്കുമ്പോൾ ഒരു സഹനടനുമായി വിവാഹേതര ബന്ധത്തിൽ ഏർപ്പെട്ട ഒരു നടിയാണ് വിഷയമെങ്കിൽ, അത്തരം കാര്യങ്ങൾ ഇത്രയും ലഘുവായി തമാശരൂപേണയോ കാണില്ലായിരുന്നു. ഈ സമൂഹം മുഴുവൻ പൊട്ടിത്തെറിച്ച് അവരെ അധിക്ഷേപിക്കുകയും പരിഹസിക്കുകയും ചെയ്യുമായിരുന്നു.
വിജയിക്കുന്ന കാര്യം മറന്നേക്കൂ, ഈ അക്രമ കുട്ടത്തിൽ നിന്നു രക്ഷപ്പെടാൻ വീട്ടിൽ നിന്നു പുറത്തിറങ്ങാൻ പോലും പറ്റാത്ത അവസ്ഥയായിരിക്കും ഉണ്ടാകുക.
