ആരാധകര് കാത്തിരുന്ന മമ്മൂട്ടിയുടെ ബ്രഹ്മാണ്ഡ ചരിത്ര സിനിമ മാമാങ്കം ഇന്ന് ലോകം മുഴുവനും റിലീസിന് എത്തുകയാണ്. മാസും ക്ലാസും ഒരുപോലെ വഴങ്ങുന്ന മമ്മൂട്ടി മാമാങ്കത്തിലെ ചാവേറും അനശ്വരമാക്കുമെന്നാണ് പ്രതീക്ഷ. സാമൂതിരി ഭരണ കാലഘട്ടത്തിലെ ചാവേറുകളുടെ കഥ പറഞ്ഞെത്തുന്ന മാമാങ്കം നാനൂറോളം തിയേറ്ററുകളിലാണ് റിലീസ് ചെയ്യുന്നത്. ഇപ്പോഴിതാ മനോരമ ഓണ്ലൈന് സംഘടിപ്പിച്ച കളരി ഗുരുക്കന്മാരെ ആദരിക്കുന്ന ഒരു ചടങ്ങില് കുട്ടികളുടെ ചോദ്യത്തിന് മമ്മൂട്ടി നല്കിയ രസകരമായ മറുപടികളാണ് ശ്രദ്ധ നേടുന്നത്.
ദുല്ഖറിന്റെ ജീവിതത്തില് മകള് മറിയം വരുത്തിയ മാറ്റം എന്താണ് എന്നായിരുന്നു ഒരു പെണ്കുട്ടിയുടെ ചോദ്യം. അതിന് “ദുല്ഖര് ഒരച്ഛനായി അത്രേയുള്ളൂ” എന്നു സരസമായി മമ്മൂട്ടി മറുപടി പറഞ്ഞു. മമ്മൂട്ടിയുടെ മറുപടി സദസില് ചിരിപടര്ത്തി. കുട്ടി ആരാധകര്ക്കൊപ്പം സെല്ഫി എടുത്തും അവരോട് തമാശകള് പറഞ്ഞും മമ്മൂട്ടി സദസിനെ കൈയിലെടുത്തു.
Read more
മാമാങ്കം റിലീസ് ആയതിന്റെ ആഘോഷങ്ങളിലാണ് മമ്മൂട്ടി ആരാധകര്. എം. പത്മകുമാര് സംവിധാനം ചെയ്യുന്ന ചിത്രം നിര്മിക്കുന്നത് വേണു കുന്നപ്പിള്ളിയാണ്. തിരക്കഥ ഒരുക്കിയത് ശങ്കര് രാമകൃഷ്ണന്. ഉണ്ണി മുകുന്ദന്, കനിഹ, അനു സിത്താര, സിദ്ദീഖ്, തരുണ് അറോറ, സുദേവ് നായര്, സുരേഷ് കൃഷ്ണ, പ്രാചി തെഹ്ലാന്, മാസ്റ്റര് അച്യുതന് എന്നിവരാണ് ചിത്രത്തിലെ പ്രധാന താരങ്ങള്. മനോജ് പിള്ള ഛായാഗ്രഹണം നിര്വഹിക്കുന്ന ചിത്രത്തിന് സംഗീതം ഒരുക്കുന്നത് എം. ജയചന്ദ്രന് ആണ്.