2022 മോഡല് എസ്യുവിയുടെ അവതരണത്തിനുള്ള ഒരുക്കത്തോടൊപ്പം അത്യാഡംബര വാഹനത്തിന്റെ ബുക്കിഗും ആരംഭിച്ചിരിക്കുകയാണ് ലാന്ഡ് റോവര് ഇപ്പോള്.എല്ലാ വേരിയന്റുകളുടെയും ആവര്ത്തനങ്ങളുടെയും പൂര്ണമായ വിലകള് കമ്പനി ഇതുവരെ വെളിപ്പെടുത്തിയിട്ടില്ലെങ്കിലും ഇന്ത്യയില് എത്തുമ്പോള് എസ്യുവിയുടെ എക്സ്ഷോറൂം വില 2.31 കോടി രൂപയില് ആരംഭിക്കുമെന്നാണ് കമ്പനി സ്ഥിരീകരിച്ചിരിക്കുന്നത്.
MLA-ഫ്ലെക്സ് പ്ലാറ്റ്ഫോമിന് അടിവരയിടുന്ന പുതിയ റേഞ്ച് റോവര് സ്റ്റാന്ഡേര്ഡ്, ലോംഗ് വീല്ബേസ് പതിപ്പുകളിലാണ് ഇറങ്ങുക. ആദ്യമായി 200 മില്ലീമീറ്റര് നീളമുള്ള വീല്ബേസാണ് വാഹനത്തില് കമ്പനി ഒരുക്കിയിരിക്കുന്നത്. ഈ ആഢംബര പ്രീമിയം എസ്യുവിക്ക് ഏഴ് സീറ്റര് ഓപ്ഷനും ലാന്ഡ് റോവര് വാഗ്ദാനം ചെയ്യുന്നുണ്ട്.
SE, HSE, ഓട്ടോബയോഗ്രഫി എന്നീ മോഡലുകളിലായിരിക്കും പുതിയ റേഞ്ച് റോവര് എസ്യുവി വില്പ്പനയ്ക്ക് എത്തുന്നത്.സണ്സെറ്റ് ഗോള്ഡ് സാറ്റിന് കളര് ഓപ്ഷനില് വരെ പുതുപുത്തന് റേഞ്ച് റോവര് ഉപഭോക്താക്കള്ക്ക് തെരഞ്ഞെടുക്കാന് സാധിക്കും. കൂടാതെ സ്റ്റാന്ഡേര്ഡ് അല്ലെങ്കില് ലോംഗ് വീല്ബേസ് ബോഡി ഡിസൈനുകള് അഞ്ച് സീറ്റര്, ഏഴ് സീറ്റര് ഓപ്ഷനുകളിലും വാഹനം വിപണിയില് എത്തും.
റേഞ്ച് റോവര് ഒരു അഡാപ്റ്റീവ് എയര് സസ്പെന്ഷനില് പുതിയ അഞ്ച്-ലിങ്ക് റിയര് ആക്സിലാണ് നിര്മിച്ചിരിക്കുന്നത്. അത് മുന്നോട്ടുള്ള റോഡിനെ ആശ്രയിച്ച് സിസ്റ്റം ക്രമീകരിക്കുന്നതിന് നാവിഗേഷന് സിസ്റ്റം ഉപയോഗിക്കുന്നു. ഈ സമകാലികമായ രൂപത്തോടൊപ്പം 0.30 ഡ്രാഗ് കോഫിഫിഷ്യന്റും പുത്തന് റേഞ്ച് റോവറിനുണ്ട്. ഇത് ലോകത്തിലെ ഏറ്റവും എയറോഡൈനാമിക് കാര്യക്ഷമമായ ലക്ഷ്വറി എസ്യുവിയാക്കി ഇതിനെ മാറ്റുന്നു.
ഇന്റീരിയര് ഓപ്ഷനുകള് എന്നത്തെയും പോലെ തന്നെ അത്യാഡംബരപൂര്വമാണ്. പുതിയ മോഡലില് ലാന്ഡ് റോവര് 13.7 ഇഞ്ച് ഡിജിറ്റല് ഇന്സ്ട്രുമെന്റ് ക്ലസ്റ്ററാണ് ഒരുക്കിയിരിക്കുന്നത്. ഒപ്പം സെന്റര് കണ്സോളില് ഹാപ്റ്റിക് ഫീഡ്ബാക്കോടുകൂടിയ വലിയ 13.1 ഇഞ്ച് ടച്ച്സ്ക്രീന് ഇന്ഫോടെയ്ന്മെന്റ് സ്ക്രീനും അവതരിപ്പിക്കുന്നുണ്ട്. പിന്വശത്തെ യാത്രക്കാര്ക്കായി 11.4 ഇഞ്ച് എന്റര്ടെയ്ന്മെന്റ് ഡിസ്പ്ലേകളാണ് കമ്പനി നല്കിയിരിക്കുന്നത്.അത് ഘടിപ്പിച്ചിരിക്കുന്നത് മുന് സീറ്റുകളുടെ പുറകിലും.
3.0 ലിറ്റര് പെട്രോള് മൈല്ഡ്-ഹൈബ്രിഡ്, 3.0 ലിറ്റര് ടര്ബോ-ഡീസല്, 4.4 ലിറ്റര് ട്വിന്-ടര്ബോ V8 എന്നിങ്ങനെ മൂന്ന് എഞ്ചിന് ഓപ്ഷനുകളിലാണ് 2022 റേഞ്ച് റോവര് ഇന്ത്യയിലെത്തുക.എക്സിക്യൂട്ടീവ് ക്ലാസ് പിന് സീറ്റുകള്ക്കൊപ്പം സെന്റര് ആംറെസ്റ്റില് 8.0 ഇഞ്ച് ടച്ച്സ്ക്രീനുമുണ്ട് പുതിയ മോഡലില്. പുതിയ തലമുറ റേഞ്ച് റോവറിന് 1600-വാട്ട്, 35-സ്പീക്കര് മെറിഡിയന് സിഗ്നേച്ചര് സൗണ്ട് സിസ്റ്റവും ലഭിക്കുന്നു. അതേസമയം ഓട്ടോബയോഗ്രഫി വേരിയന്റില് ഹെഡ്റെസ്റ്റില് ഉള്ച്ചേര്ത്ത ലോകത്തിലെ ആദ്യത്തെ സജീവമായ നോയ്സ്-കാന്സലിംഗ് സ്പീക്കറും ആരേയും ആകര്ഷിക്കും.
Read more
റൈഡ് ഗുണനിലവാരം കൂടുതല് സുഗമമാക്കുന്നതിന് അഡാപ്റ്റീവ് ക്രൂയിസ് കണ്ട്രോളും സ്റ്റിയറിംഗ് അസിസ്റ്റും യൂണിറ്റ് പ്രവര്ത്തിപ്പിക്കുന്നു. മോഡലിന് ഇലക്ട്രോണിക് കണ്ട്രോള്ഡ് ആക്റ്റീവ് ആന്റി-റോള് ബാറുകളുമുണ്ട്. കൂടാതെ പിന്നിലെ വീലുകളെ 7.3 ഡിഗ്രി വരെ വൈദ്യുതമായി ചലിപ്പിക്കാന് കഴിയുന്ന ഓള്-വീല് സ്റ്റിയറിങ്ങും പുത്തന് റേഞ്ച് റോവര് എസ്യുവിക്കുണ്ട്.പുതിയ റേഞ്ച് റോവറിന് നൈറ്റ്ഷിഫ്റ്റ് മോഡുള്ള 360 ഡിഗ്രി ക്യാമറയും മൊബൈല് ആപ്പ് ഉപയോഗിച്ച് വാഹനത്തില് നിന്ന് ഇറങ്ങാനും പാര്ക്ക് ചെയ്യാനും അനുവദിക്കുന്ന ആപ്പ് അധിഷ്ഠിത പാര്ക്കിംഗ് ഫീച്ചറും ഈ വാഹനത്തിലുണ്ട്. വാട്ടര് വേഡിംഗ് കപ്പാസിറ്റി ഇപ്പോള് 900 മില്ലീമീറ്ററാണ്.