‘എല്‍ഡിഎഫിനെ സിപിഐഎമ്മിനെ രാഷ്ട്രീയമായി വേട്ടയാടിയാല്‍ ഞങ്ങള്‍ നോക്കിനില്‍ക്കില്ല, ഈ വാക്യത്തില്‍ ഒന്നും മാറിപ്പോകരുത്’; ബിനോയ് വിശ്വം

സിഎംആർഎൽ–എക്സാലോജിക് ഇടപാടിൽ പ്രതിപക്ഷ നേതാവ് പിണറായി വിജയൻ ഉൾപ്പെടെയുള്ളവർക്കെതിരെ കേസെടുക്കാമെന്ന സർക്കാരിന് ലഭിച്ച നിയമോപദേശത്തിൽ കൂടുതൽ പ്രതികരണം പിന്നീട് നടത്താമെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. വിഷയം വിശദമായി പഠിച്ച ശേഷമായിരിക്കും പാർട്ടിയുടെ നിലപാട് വ്യക്തമാക്കുകയെന്നും അദ്ദേഹം പറഞ്ഞു. പിണറായിക്കെതിരെ നടക്കുന്നത് രാഷ്ട്രീയ വേട്ടയാടലാണോ എന്ന ചോദ്യത്തിനും ബിനോയ് വിശ്വം കൃത്യമായ മറുപടി നൽകിയില്ല.

കേസ് രാഷ്ട്രീയ പ്രേരിതമാണോ എന്ന ചോദ്യത്തിന് വിഷയം പഠിച്ചുവരികയാണെന്നും സിപിഐയുടെ നിലപാട് നേരത്തെ വ്യക്തമാക്കിയിട്ടുണ്ടെന്നും ബിനോയ് വിശ്വം പറഞ്ഞു. ഇക്കാര്യത്തിൽ നിലപാട് ഇടയ്ക്കിടെ ആവർത്തിക്കേണ്ടതില്ലെന്നും കേസും തുടർനടപടികളും നിയമപരമായ വഴിക്ക് പോകട്ടെയെന്നും അദ്ദേഹം വ്യക്തമാക്കി.

അതേസമയം, എൽഡിഎഫിനെയോ സിപിഐഎമ്മിനെയോ രാഷ്ട്രീയമായി വേട്ടയാടിയാൽ സിപിഐ നോക്കിനിൽക്കില്ലെന്ന് ബിനോയ് വിശ്വം പറഞ്ഞു. “എൽഡിഎഫിനെ, സിപിഐഎമ്മിനെ രാഷ്ട്രീയമായി വേട്ടയാടിയാൽ ഞങ്ങൾ നോക്കിനിൽക്കില്ല” എന്നായിരുന്നു അദ്ദേഹത്തിന്റെ പ്രതികരണം.

ഇഡി നടപടി രാഷ്ട്രീയ വേട്ടയാടലായി കാണാമോ എന്ന ചോദ്യത്തിന് ഇപ്പോൾ ഒന്നും പറയില്ലെന്നും അതേക്കുറിച്ച് തീരുമാനിക്കേണ്ടത് മാധ്യമങ്ങളാണെന്നുമായിരുന്നു ബിനോയ് വിശ്വത്തിന്റെ മറുപടി. സിഎംആർഎൽ–എക്സാലോജിക് ഇടപാടിൽ അന്വേഷണം നടത്താമെന്ന് അഡ്വക്കേറ്റ് ജനറൽ സർക്കാരിന് നിയമോപദേശം നൽകിയ സാഹചര്യത്തിലാണ് സിപിഐ സംസ്ഥാന സെക്രട്ടറിയുടെ പ്രതികരണം.