‘യുഡിഎഫ് സര്‍ക്കാര്‍ ഒരു യു ടേൺ ഗവൺമെന്റായി മാറി’; പൊതിച്ചോർ വിവാദത്തിൽ കെ. മുരളീധരനെതിരെ വി. എൻ. വാസവൻ

പൊതിച്ചോർ വിവാദത്തിൽ ആരോഗ്യ മന്ത്രി കെ മുരളീധരനെ വിമർശിച്ച് മുൻ മന്ത്രി വി. എൻ. വാസവൻ. യുഡിഎഫ് സർക്കാർ ഒരു യു ടേൺ ഗവൺമെന്റായി മാറിയെന്ന് വിമർശിച്ച അദ്ദേഹം, കമ്മ്യൂണിറ്റി കിച്ചൺ പദ്ധതി പ്രായോഗികമല്ലെന്നും പ്രതികരിച്ചു.
പണം ഉണ്ടായിട്ടും ഭക്ഷണം വാങ്ങാൻ കഴിയാത്തവർക്ക് സഹായം നൽകുന്നതിനായാണ് ഡിവൈഎഫ്ഐ പൊതിച്ചോർ വിതരണം നടത്തുന്നതെന്ന് അദ്ദേഹം പറഞ്ഞു.

ഈ പ്രവർത്തനത്തെ നിരവധിപ്പർ അഭിനന്ദിച്ചിരുന്നു. ജാതിയോ മതമോ രാഷ്ട്രീയമോ നോക്കിയല്ല പൊതിച്ചോർ വിതരണം ചെയ്യുന്നത്. എന്തെങ്കിലും പാകപ്പിഴകൾ സംഭവിച്ചാൽ ഉത്തരവാദികളായവരെ തിരിച്ചറിയുന്നതിനായാണ് ബോർഡ് സ്ഥാപിക്കുന്നതെന്നും, സംഘടന നോക്കിയല്ല ആളുകൾ ഭക്ഷണം സ്വീകരിക്കുന്നതെന്നും വാസവൻ പറഞ്ഞു.

പൊതിച്ചോർ വിതരണം ചെയ്യാൻ പാടില്ലെന്ന മന്ത്രിയുടെ നിലപാട് മാനവികതയ്ക്ക് എതിരാണെന്നും അദ്ദേഹം കുറ്റപ്പെടുത്തി. അതേസമയം, ഡിവൈഎഫ്ഐയുടെ പൊതിച്ചോർ വിതരണവുമായി ബന്ധപ്പെട്ട് ആരോഗ്യ മന്ത്രി കെ മുരളീധരൻ വീണ്ടും പ്രതികരിച്ചു. അന്നം മുടക്കിയിട്ടില്ലെന്നും ആലപ്പുഴയിലെ സ്ഥലം കയ്യേറ്റവുമായി ബന്ധപ്പെട്ട വിഷയത്തിലാണ് ഇടപെട്ടതെന്നും മന്ത്രി വ്യക്തമാക്കി.

ആലപ്പുഴയിൽ സ്ഥലം കയ്യേറ്റം സംബന്ധിച്ച് പരാതി ലഭിച്ചിരുന്നുവെന്നും കമ്മ്യൂണിറ്റി കിച്ചൺ ആരംഭിച്ചത് ആശുപത്രി വികസന സമിതിയുടെ തീരുമാനപ്രകാരമാണെന്നും കെ മുരളീധരൻ പറഞ്ഞു. നിലവിൽ ആലപ്പുഴയിൽ മാത്രമായിരിക്കും കമ്മ്യൂണിറ്റി കിച്ചൺ നടപ്പാക്കുകയെന്നും മറ്റ് ആശുപത്രികളിൽ ഇത് സംബന്ധിച്ച് തീരുമാനമെടുത്തിട്ടില്ലെന്നും മന്ത്രി കൂട്ടിച്ചേർത്തു.