ഐപിഎല്ലില്‍ മുംബൈ ടീമില്‍ തുടര്‍ച്ചയായ രണ്ടാം സീസണിലും അവസരം ലഭിക്കാത്ത മകന്‍ അര്ജുന് ടെണ്ടുല്‍ക്കര്‍ക്കു ഉപദേശവുമായി അച്ഛനും ക്രിക്കറ്റ് ഇതിഹാസവുമായ സച്ചിന്‍ ടെണ്ടുല്‍ക്കര്‍. മുന്നോടുള്ള പാത എല്ലായ്പ്പോഴും വെല്ലുവിളി നിറഞ്ഞതാണെന്നും കഠിനമായി അധ്വാനിക്കു, അതിന്റെ ഫലം പിറകെ വരുമെന്നും അര്‍ജുനെ സച്ചിന്‍ ഉപദേശിച്ചു.
‘സീസണ്‍ അവസാനിച്ചുകഴിഞ്ഞു. അര്ജുന് അവന്റെ ഗെയിമിലാണ് ശ്രദ്ധിക്കേണ്ടത്. സെലക്ഷനെക്കുറിച്ച് ചിന്തിക്കാന്‍ പാടില്ല. മുംബൈ ടീമിന്റെ സെലക്ഷന്‍ കാര്യങ്ങളില്‍ ഞാന്‍ ഇടപെടാറില്ല. ഞാന്‍ അവയെല്ലാം ടീം മാനേജ്മെന്റിനു വിടുകയാണ് ചെയ്യാറുള്ളത്.’
‘മുന്നോടുള്ള പാത എല്ലായ്പ്പോഴും വെല്ലുവിളി നിറഞ്ഞതാവും എന്നാണ് അര്‍ജുനോട് എനിക്ക് പറയാനുള്ളത്. അതു വളരെ ബുദ്ധിമുട്ടേറിയതായിരിക്കും. ക്രിക്കറ്റിനോടുള്ള ഇഷ്ടം കൊണ്ടാണ് നീ ഈ ഗെയിം കളിക്കാന്‍ ആരംഭിച്ചത്. അതു അങ്ങനെ തന്നെ തുടരുകയും വേണം. കഠിനമായി അധ്വാനിക്കു, അതിന്റെ ഫലം പിറകെ വരും’ സച്ചിന്‍ പറഞ്ഞു.
2021ലും മുംബൈ ഇന്ത്യന്‍സിന്റെ ഭാഗമായിരുന്ന അര്‍ജുനെ ഇത്തവണയും മെഗാ ലേലത്തില്‍ മുംബൈ സ്വന്തമാക്കുകയായിരുന്നു. 30 ലക്ഷം രൂപക്കായിരുന്നു അര്‍ജുനെ മുംബൈ സ്വന്തമാക്കിയത്.
ആഭ്യന്തര ക്രിക്കറ്റില്‍ ഇതിനോടകം ഭേദപ്പെട്ട പ്രകടനം നടത്താന്‍ അര്‍ജുനായിട്ടുണ്ട്. മോശമല്ലാത്ത രീതിയില്‍ പന്തെറിയുന്നതോടൊപ്പം ബാറ്റ് ചെയ്യാനും അര്ജുന് മികവുണ്ട്. രണ്ട് ടി20യില്‍ നിന്ന് 67 റണ്‍സും മൂന്ന് വിക്കറ്റും അര്ജുന് നേടിയിട്ടുണ്ട്.