ഇന്ത്യന് ടീമിലെ തന്റെ ഫേവറിറ്റ് ബാറ്റിംഗ് പങ്കാളി ആരാണെന്നു വെളിപ്പെടുത്തി ക്യാപ്റ്റനും സ്റ്റാര് ഓപ്പണറുമായ രോഹിത് ശര്മ. നിലവില് മൂന്നു ഫോര്മാറ്റുകളിലും ദേശീയ ടീമിന്റെ ഭാഗമല്ലാത്ത ഇടംകൈയന് ഓപ്പണര് ശിഖര് ധവാനെയാണ് ഏറ്റവും പ്രിയപ്പെട്ട ബാറ്റിംഗ് പങ്കാളിയായി രോഹിത് ചൂണ്ടിക്കാണിച്ചിരിക്കുന്നത്.
ഞാന് ഏറെ ആസ്വദിച്ചിട്ടുള്ള കൂട്ടുകെട്ട് കൂടിയായിരുന്നു ശിഖറിനൊപ്പമുള്ളത്. നമ്മളിലേക്കു കൂടി ‘പകരുന്ന’ വലിയ ഊര്ജമുള്ള വ്യക്തിയാണ് അദ്ദേഹം. ശിഖര് നമുക്കു ചുറ്റുമുണ്ടാവുമ്പോള് അതു രസകരമായ നിമിഷങ്ങളായിരിക്കും സമ്മാനിക്കുക. ഓപ്പണിംഗ് ജോഡികളെന്ന നിലയില് ഇന്ത്യക്കൊപ്പം പല റെക്കോര്ഡുകളും തകര്ക്കാന് ഇതു സഹായിച്ചു- രോഹിത് വെളിപ്പെടുത്തി.
വിരാട് കോഹ്ലി, ശുഭ്മാന് ഗില്, കെ.എല് രാഹുല്, ഇഷാന് കിഷന് തുടങ്ങിയവരെയെല്ലാം മറികടന്നാണ് രോഹിത് ധവാനെ തിരഞ്ഞെടുത്തതെന്നതാണ് ശ്രദ്ധേയം. 2013ല് ഇംഗ്ലണ്ടില് നടന്ന ഐസിസി ചാമ്പ്യന്സ് ട്രോഫിയിലായിരുന്നു ആദ്യമായി രോഹിത്തും ധവാവും ഇന്ത്യക്കു വേണ്ടി ഓപ്പണ് ചെയ്തത്.
Read more
117 ഇന്നിംഗ്സുകളിലാണ് ഇരുവരും ഒരുമിച്ച് ബാറ്റ് ചെയ്തിട്ടുള്ളത്. ഇവയില് നിന്നും 5193 റണ്സ് നേടുകയും ചെയ്തു. രോഹിത്തും കോഹ്ലിയും ഏകദിനത്തില് 86 ഇന്നിംഗ്സുകളില് ഒരുമിച്ച് ബാറ്റ് ചെയ്തിട്ടുണ്ട്. ഇവയില്നിന്നും 5008 റണ്സ് നേടാന് ഈ സഖ്യത്തിനു കഴിഞ്ഞു.