ഇപ്പോൾ നടക്കുന്ന ടി 20 ലോകകപ്പിൽ മികച്ച പ്രകടനമാണ് ഇന്ത്യ നടത്തി വരുന്നത്. ഗ്രൂപ്പ് ഘട്ടത്തിലെ എല്ലാ മത്സരങ്ങളിലും ഇന്ത്യ വിജയം സ്വന്തമാക്കിയിരുന്നു. ഇനി സൂപ്പർ ഏട്ടിലെ ആദ്യ മത്സരം ദക്ഷിണാഫ്രിക്കയ്ക്കെതിരെയാണ് നടക്കാൻ പോകുന്നത്. നിലവിലെ ഇന്ത്യൻ ടീമിൽ ഓപ്പണർ അഭിഷേക് ശർമയുടെ ഫോം ഔട്ട് മാത്രമാണ് പ്രശ്നം.
ടൂർണമെന്റിൽ ഇന്ത്യയുടെ വെടിക്കെട്ട് ബാറ്ററാകുമെന്ന പ്രതീക്ഷിച്ചിരുന്ന അഭിഷേക് കളിച്ച മൂന്നു മത്സരങ്ങളിലും പൂജ്യത്തിന് പുറത്തായി. ന്യൂസിലൻഡിനെതിരായ പരമ്പരയിൽ തകർത്തടിച്ച ഒന്നാം നമ്പർ ട്വന്റി20 ബാറ്റർ, സൂപ്പർ എട്ടിലേക്ക് കടക്കുമ്പോഴും ബൗളർമാരുടെ പേടിസ്വപ്നം തന്നെയാണ്. ഇപ്പോഴിതാ സഞ്ജു സാംസണാണ് ഓപ്പണറാകാൻ അർഹൻ എന്ന് പറഞ്ഞിരിക്കുകയാണ് മുൻ ഇന്ത്യൻ താരം അനിൽ കുംബ്ലെ.
‘ അഭിഷേക് കഴിഞ്ഞ എട്ട് മത്സരങ്ങളിൽ അഞ്ച് തവണ ഡക്ക് നേടിയിട്ടുണ്ട്. പ്രധാനപ്പെട്ട മത്സരങ്ങളിൽ അദ്ദേഹത്തിന്റെ ഫോമിൽ വിശ്വസിക്കാൻ കഴിയില്ല. സഞ്ജു ലോകകപ്പിൽ കളിക്കാൻ അർഹനാണ്. പലപ്പോഴും അദ്ദേഹം തിരഞ്ഞെടുക്കപ്പെടുകയും കളിക്കാതെ ബെഞ്ചിൽ ഇരിക്കുകയും ചെയ്യും’
‘അടുത്ത മൂന്നു മത്സരങ്ങളിൽ ഒന്ന് അഭിഷേക് ശർമയ്ക്കും രണ്ട് മത്സരങ്ങൾ സഞ്ജു സാംസണും നൽകണം. മികച്ച പ്രകടനം നടത്തുന്നവരിൽ ഒരാൾ സെമി ഫൈനലിൽ ഇഷാൻ കിഷനോടൊപ്പം ഓപണിംഗിൽ കളിക്കട്ടെ. ലോകകപ്പിൽ രണ്ട് കളിക്കാർക്കും തുല്യ അവസരങ്ങൾ കൊടുക്കണം’ അനിൽ കുംബ്ലെ പറഞ്ഞു.