ജനങ്ങളുടെ അനുഗ്രഹം ഒപ്പമുണ്ടെങ്കിൽ ബിജെപി അധികാരത്തിൽ തിരിച്ചെത്തുമെന്ന് നിശ്ചയദാർഢ്യം പ്രകടിപ്പിച്ച് മഹാരാഷ്ട്ര മുൻ മുഖ്യമന്ത്രി ദേവേന്ദ്ര ഫഡ്നാവിസ്. “ജനങ്ങളുടെ അനുഗ്രഹം ഉണ്ടെങ്കിൽ ആർക്കും ഞങ്ങളെ തടുക്കാനാവില്ല.. അവരുടെ അനുഗ്രഹം ഉണ്ടെങ്കിൽ ഞങ്ങൾ തിരികെ വന്നിരിക്കും”എന്നായിരുന്നു പുനെയില്‍ നടന്ന ഒരു ചടങ്ങിൽ ബിജെപി നേതാവ് വ്യക്തമാക്കിയത്.
“അധികാരത്തിലായാലും പ്രതിപക്ഷത്തിലായാലും നേർപാതയിലൂടെ മാത്രം സഞ്ചരിക്കണം. അതിനായി നിങ്ങളുടെ അനുഗ്രഹം ആവശ്യമാണ്. ആ അനുഗ്രഹം തേടിയാണ് ഞാനിവിടെ വന്നിരിക്കുന്നത്.. നിങ്ങളുടെ അനുഗ്രഹം ഉണ്ടെങ്കിൽ ഉറപ്പായും ഒരു തിരിച്ചുവരവുണ്ടാകും”- ഫഡ്നാവിസ് പറഞ്ഞു.
Read more
കഴിഞ്ഞ ഒക്ടോബറിൽ നടന്ന മഹാരാഷ്ട്ര നിയമസഭാ തിരഞ്ഞെടുപ്പിൽ “ഞാന്‍ വീണ്ടും അധികാരത്തിലേറും” എന്നതായിരുന്നു ഫഡ്നാവിസിന്റെ പ്രചാരണ മുദ്രാവാക്യം. നാടകീയനീക്കങ്ങൾക്ക് ഒടുവിൽ ഫഡ്നാവിസ് സർക്കാർ സത്യപ്രതിജ്ഞ ചെയ്ത് അധികാരത്തിലേറിയെങ്കിലും മണിക്കൂറുകൾ മാത്രമെ ആ സർക്കാരിന് ആയുസ്സുണ്ടായിരുന്നുള്ളു. ഒടുവിൽ ശിവസേന- എൻസിപി-കോൺഗ്രസ് സഖ്യം മഹാരാഷ്ട്രയിൽ അധികാരത്തിലേറുകയും ചെയ്തു.
