‘രതിനിര്‍വേദം’ എന്ന സിനിമയിലൂടെ ശ്രദ്ധ നേടിയ താരമാണ് ശ്രീജിത്ത് വിജയ്. ടെലിവിഷന്‍ ഷോകളില്‍ അവതാരകന്‍ ആയി എത്തിയ താരം ഇപ്പോള്‍ സീരിയലില്‍ സജീവമാണ്. താരത്തിന്റെ പുതിയ സോഷ്യല്‍ മീഡിയ പോസ്റ്റ് ആണ് ഇപ്പോള്‍ വൈറലാകുന്നത്. തന്റെ നാലാം വിവാഹം എന്ന് കുറിച്ചു കൊണ്ടാണ് ശ്രീജിത്തിന്റെ പോസ്റ്റ്.
‘ഇതും കൂടെ കൂടി ഇത് നാലാമത്തെ കല്യാണമാ, അനുഗ്രഹിക്കണം’ എന്നാണ് പുതിയ ഫോട്ടോയുടെ ക്യാപ്ഷനായി ശ്രീജിത്ത് കുറിച്ചിരിക്കുന്നത്. പെട്ടെന്ന് തന്നെ ഈ പോസ്റ്റ് വൈറലാവുകയും ചെയ്തു. നടനെതിരെ വിമര്‍ശനങ്ങളും ഉയര്‍ന്നിരുന്നു. എന്നാല്‍ ഇത് റിയല്‍ വിവാഹമല്ല, റീല്‍ വിവാഹമാണ്.
സൂര്യ ടിവിയില്‍ എത്തുന്ന അമ്മക്കിളിക്കൂട് എന്ന സീരിയലിലെ വിവാഹത്തിന്റെ കാര്യമാണ് ശ്രീജിത്ത് പങ്കുവച്ചത്. നന്ദന്‍ എന്ന കഥാപാത്രവും ശരണ്യയും തമ്മിലുള്ള വിവാഹമാണ് സീരിയലില്‍ നടക്കുന്നത്. മുമ്പും സീരിയലുകളില്‍ വിവാഹം കഴിച്ചിട്ടുള്ളത് കൊണ്ടാണ് ഇത്തവണ നാലാമത്തേതാണെന്ന് നടന്‍ സൂചിപ്പിച്ചിരിക്കുന്നത്.
നേരത്തെ സ്വാതി നക്ഷത്രം ചോതി, കുടുംബവിളക്ക് തുടങ്ങിയ സീരിയലുകളിലും ശ്രീജിത്ത് വിവാഹിതനാവുന്ന സീനില്‍ അഭിനയിച്ചിരുന്നു. യഥാര്‍ഥ ജീവിതത്തിലും ശ്രീജിത്ത് വിവാഹിതനാണ്. അര്‍ച്ചന ഗോപിനാഥാണ് നടന്റെ ഭാര്യ. 2018ല്‍ ആണ് ശ്രീജിത്തും അര്‍ച്ചനയും തമ്മില്‍ വിവാഹിതരാവുന്നത്.
ഫെയ്‌സ്ബുക്കിലൂടെ പ്രണയത്തില്‍ ആയതിന് ശേഷമാണ് ശ്രീജിത്തും അര്‍ച്ചനയും വിവാഹിതരാവുന്നത്. അതേസമയം, ലിവിംഗ് ടുഗെദര്‍ എന്ന സിനിമയിലൂടെ 2011ല്‍ ആണ് ശ്രീജിത്ത് സിനിമയില്‍ എത്തുന്നത്. ഒരു നല്ല കോട്ടയംകാരന്‍ ആണ് ശ്രീജിത്തിന്റെതായി ഒടുവില്‍ തിയേറ്ററുകളിലെത്തിയത്.