ബ്രെയിൻ ഹണ്ട് 2026: ബൗദ്ധിക മികവിന്റെ ആഘോഷം; ഭവൻസ് വിദ്യാമന്ദിർ, ഗിരിനഗർ ജേതാക്കൾ

റോട്ടറി ക്ലബ് ഓഫ് കൊച്ചിൻ ക്വീൻ സിറ്റി സംഘടിപ്പിച്ച അഞ്ചാമത് ബ്രെയിൻ ഹണ്ട് 2026 അന്തർസ്‌കൂൾ ക്വിസ് മത്സരം സെപ്റ്റംബർ 19ന് എറണാകുളം സെന്റ് തെരേസാസ് കോളേജിൽ നടന്നു. 35-ലധികം സ്‌കൂളുകളിൽ നിന്നായി 91 ടീമുകൾ പങ്കെടുത്ത മത്സരം മികച്ച മത്സരവീര്യത്തിനും ആവേശത്തിനും സാക്ഷ്യം വഹിച്ചു.

ഭവൻസ് വിദ്യാമന്ദിർ, ഗിരിനഗറിലെ കിരൺ തോമസ്, നകുൽ, സാകേത് സന്ദീപ് എന്നിവരടങ്ങിയ ടീം ബ്രെയിൻ ഹണ്ട് 2026-ൽ ഒന്നാം സ്ഥാനം നേടി.

രാജഗിരി പബ്ലിക് സ്‌കൂൾ, കളമശ്ശേരിയിലെ ഏബൽ സേവ്യർ, ജോസഫ് ടോം, ലൂക്ക് ജോസ് ജോർജ് എന്നിവർ ഉൾപ്പെട്ട ടീം രണ്ടാം സ്ഥാനം കരസ്ഥമാക്കി.

ഭവൻസ് വിദ്യാമന്ദിർ, എളമക്കരയിലെ അദ്വൈത് സുബ്രഹ്മണി ആനന്ദ്, ആര്നവ് രാഹുൽ, പ്രണവ് സന്തോഷ് എന്നിവർ മൂന്നാം സ്ഥാനത്തിനർഹരായി.

സമാപനച്ചടങ്ങിൽ റോട്ടറി മുൻ ഡിസ്ട്രിക്ട് ഗവർണർ ആർടിഎൻ. വെണുഗോപാൽ സി. ഗോവിന്ദ് മുഖ്യാതിഥിയായിരുന്നു. റോട്ടറി ക്ലബ് ഓഫ് കൊച്ചിൻ ക്വീൻ സിറ്റി പ്രസിഡന്റ് ആർടിഎൻ. ലിജി എബ്രഹാം, ഇവന്റ് ചെയർ ആർടിഎൻ. മോഹൻ എസ്. മേനോൻ, ഡിസ്ട്രിക്ട് ഡയറക്ടർ ആർടിഎൻ. സതീഷ് വാര്യർ, അസിസ്റ്റന്റ് ഗവർണർ ആർടിഎൻ. ബാലചന്ദ്ര പണിക്കർ, ജിജിആർ ആർടിഎൻ. ദീപ അലക്സ് എന്നിവർ ചടങ്ങിൽ പങ്കെടുത്ത് വിജയികളെയും മത്സരാർത്ഥികളെയും അഭിനന്ദിച്ചു.

ആദ്യ സീസൺ മുതൽ ബ്രെയിൻ ഹണ്ടിന്റെ ക്വിസ് മാസ്റ്ററായി പ്രവർത്തിച്ചുവരുന്ന PGR നായർ തന്നെയാണ് ഇത്തവണയും ക്വിസ് നിയന്ത്രിച്ചത്. യുവതലമുറയിലെ അറിവിനോടും ബൗദ്ധിക അന്വേഷണങ്ങളോടുമുള്ള താൽപര്യത്തിന്റെ പ്രതിഫലനമാണ് ബ്രെയിൻ ഹണ്ടിന്റെ വളർച്ചയെന്ന് അദ്ദേഹം പറഞ്ഞു.