അന്നം മുട്ടിച്ച് ഇന്ധനം; കോർപ്പറേറ്റുകൾക്കായി കേന്ദ്രം നടത്തുന്ന എഥനോൾ കൊള്ള

രാജ്യത്തിന്റെ ഊർജ്ജ സുരക്ഷയും കാർഷിക സമ്പദ്‌വ്യവസ്ഥയും മെച്ചപ്പെടുത്താനെന്ന വ്യാജേന ബിജെപി നേതൃത്വം നൽകുന്ന കേന്ദ്ര സർക്കാർ നടപ്പിലാക്കിയ എഥനോൾ നയം യഥാർത്ഥത്തിൽ സാധാരണക്കാരന്റെ പട്ടിണിയിലേക്ക് നയിക്കുന്ന ഒരു വലിയ കോർപ്പറേറ്റ് കൊള്ളയായി മാറിയിരിക്കുകയാണ്. ഹരിതോർജ്ജം, കർഷകക്ഷേമം എന്നീ ആകർഷകമായ വാഗ്ദാനങ്ങൾക്ക് കീഴിൽ നരേന്ദ്ര മോദി സർക്കാർ അവതരിപ്പിച്ച ഈ നയം, ഇന്ന് രാജ്യത്തിന്റെ ഭക്ഷ്യസുരക്ഷയെയും കാർഷിക മേഖലയെയും ഒരുപോലെ തകർത്തെറിഞ്ഞിരിക്കുന്നു.

കേവലമൊരു പാരിസ്ഥിതിക നയം എന്നതിനപ്പുറം, സാധാരണക്കാരന്റെ അന്നവും കർഷകന്റെ വിയർപ്പും ചൂഷണം ചെയ്ത് വൻകിട കോർപ്പറേറ്റുകളുടെ കീശ വീർപ്പിക്കാനുള്ള ബിജെപി സർക്കാരിന്റെ ഗൂഢലക്ഷ്യമാണ് ഇതിലൂടെ മറനീക്കി പുറത്തുവരുന്നത്. പെട്രോളിൽ ഇരുപത് ശതമാനം എത്തനോൾ കലർത്തുക എന്ന ലക്ഷ്യത്തിലേക്ക് യാതൊരു ദീർഘവീക്ഷണവുമില്ലാതെ കേന്ദ്ര സർക്കാർ എടുത്തുചാടിയപ്പോൾ, അതിന്റെ വലിയ വില നൽകേണ്ടി വരുന്നത് രാജ്യത്തെ കോടിക്കണക്കിന് വരുന്ന ദരിദ്രരും കർഷകരുമാണ്.

​പെട്രോളിയം ഇറക്കുമതിച്ചെലവ് കുറയ്ക്കുക എന്ന പ്രഖ്യാപിത ലക്ഷ്യത്തോടെ കേന്ദ്ര സർക്കാർ എത്തനോൾ ബ്ലെൻഡിംഗ് പദ്ധതി ശക്തമാക്കിയപ്പോൾ, അതിലൂടെ കർഷകർക്ക് കരിമ്പിന്റെ വില കുടിശ്ശികയില്ലാതെ ലഭിക്കുമെന്നായിരുന്നു ബിജെപി നേതാക്കളുടെ അവകാശവാദം. എന്നാൽ പ്രായോഗിക തലത്തിൽ, ഈ നയം രാജ്യത്തെ വൻകിട പഞ്ചസാര മില്ലുടമകൾക്കും കോർപ്പറേറ്റ് മുതലാളിമാർക്കും കോടികൾ കൊയ്യാനുള്ള സുവർണ്ണാവസരമായാണ് മാറിയത്.

പഞ്ചസാര നിർമ്മാണത്തിനായി ഉപയോഗിക്കേണ്ട കരിമ്പ് നീരും മൊളാസസും യാതൊരു നിയന്ത്രണവുമില്ലാതെ ഇന്ധന നിർമ്മാണത്തിനായി വകമാറ്റാൻ കേന്ദ്ര സർക്കാർ പച്ചക്കൊടി കാണിച്ചപ്പോൾ, അതിന്റെ യഥാർത്ഥ ഗുണഭോക്താക്കൾ ഉത്തരേന്ത്യയിലെയും മഹാരാഷ്ട്രയിലെയും ബിജെപി അനുകൂലികളായ അതിസമ്പന്നരായ മില്ലുടമകളായിരുന്നു. കർഷകരുടെ താല്പര്യങ്ങളേക്കാൾ, തങ്ങൾക്ക് തിരഞ്ഞെടുപ്പ് ഫണ്ട് നൽകുന്ന മുതലാളിമാരുടെ ലാഭത്തിന് മാത്രമാണ് കേന്ദ്ര സർക്കാർ ഇവിടെ മുൻഗണന നൽകിയത്. കരിമ്പിന് സർക്കാർ പ്രഖ്യാപിക്കുന്ന ന്യായവില പോലും കർഷകർക്ക് ലഭിക്കുന്നില്ല എന്ന യാഥാർത്ഥ്യത്തിന് നേരെ പൂർണ്ണമായും കണ്ണടയ്ക്കുകയാണ് ഭരണകൂടം ചെയ്തത്.

​കാലാവസ്ഥാ വ്യതിയാനവും വരൾച്ചയും മൂലം കരിമ്പ് ഉത്പാദനം ഗണ്യമായി കുറഞ്ഞത് കർഷകരുടെ സാമ്പത്തിക പ്രതിസന്ധി രൂക്ഷമാക്കിയപ്പോൾ അവരെ സഹായിക്കാൻ യാതൊരു നടപടിയും കേന്ദ്ര സർക്കാർ സ്വീകരിച്ചില്ല. വളം, കീടനാശിനി, തൊഴിലാളികളുടെ കൂലി എന്നിവയുൾപ്പെടെയുള്ള കൃഷിച്ചെലവുകൾ കുതിച്ചുയരുമ്പോഴും അതിനനുസരിച്ചുള്ള വരുമാനം കർഷകർക്ക് നിഷേധിക്കപ്പെട്ടു. ഒരു വശത്ത് കർഷകർ കടക്കെണിയിൽ നട്ടംതിരിയുമ്പോൾ, മറുവശത്ത് ഈ നയം രാജ്യത്തിന്റെ ഭക്ഷ്യസുരക്ഷയ്ക്ക് മേൽ വലിയൊരു വെല്ലുവിളിയായി മാറി.

വാഹനങ്ങളുടെ ഇന്ധനടാങ്ക് നിറയ്ക്കാൻ ജനങ്ങളുടെ അന്നം ചൂഷണം ചെയ്യപ്പെടുന്ന ക്രൂരമായ കാഴ്ചയാണ് ‘ഭക്ഷണമോ അതോ ഇന്ധനമോ’ എന്ന ചോദ്യത്തിലൂടെ രാജ്യത്ത് ഉയർന്നുവന്നത്. ആഭ്യന്തര വിപണിയിൽ പഞ്ചസാര വില ദിനംപ്രതി കുതിച്ചുയരുമ്പോഴും കോടിക്കണക്കിന് രൂപയുടെ കരിമ്പ് നീരാണ് ഇന്ധന നിർമ്മാണത്തിനായി കേന്ദ്ര സർക്കാർ വകമാറ്റിയത്. പഞ്ചസാരയ്ക്ക് പുറമെ അരിയും ചോളവും ഉൾപ്പെടെയുള്ള മറ്റ് അവശ്യ ഭക്ഷ്യധാന്യങ്ങളും ഇതേ രീതിയിൽ എത്തനോൾ നിർമ്മാണത്തിനായി ഉപയോഗിക്കാൻ തുടങ്ങിയത് കേന്ദ്ര സർക്കാരിന്റെ മനുഷ്യത്വരഹിതമായ മുഖമാണ് വെളിപ്പെടുത്തുന്നത്.

​എന്നാൽ കോർപ്പറേറ്റുകളെ പ്രീണിപ്പിക്കാനുള്ള ബിജെപി സർക്കാരിന്റെ ഈ നീക്കം ഒടുവിൽ അവർക്ക് തന്നെ വലിയൊരു രാഷ്ട്രീയ തിരിച്ചടിയായി മാറുന്ന കാഴ്ചയാണ് പിന്നീട് കണ്ടത്. വിലക്കയറ്റത്തിൽ പൊറുതിമുട്ടിയ ജനങ്ങൾ തിരഞ്ഞെടുപ്പുകളിൽ സർക്കാരിനെതിരെ തിരിയുമെന്ന ഭീതി ഉയർന്നതോടെ, തങ്ങളുടെ സ്വന്തം തീരുമാനങ്ങളിൽ നിന്ന് കേന്ദ്രത്തിന് പിന്നോട്ട് പോകേണ്ടി വന്നു.

വില നിയന്ത്രിക്കാനായി പഞ്ചസാര കയറ്റുമതി നിരോധിക്കുകയും കരിമ്പ് നീരിൽ നിന്നുള്ള എത്തനോൾ ഉത്പാദനത്തിന് നിയന്ത്രണം ഏർപ്പെടുത്തുകയും ചെയ്ത സർക്കാരിന്റെ മലക്കംമറിച്ചിൽ പുതിയൊരു രാഷ്ട്രീയ പ്രതിസന്ധിക്കാണ് തിരികൊളുത്തിയത്. സർക്കാരിന്റെ വാക്ക് വിശ്വസിച്ച് എത്തനോൾ പ്ലാന്റുകളിൽ കോടികൾ നിക്ഷേപിച്ച വമ്പൻ പഞ്ചസാര ലോബികൾ ഇതോടെ ബിജെപിക്കെതിരെ തിരിഞ്ഞു. വോട്ട് ബാങ്ക് സംരക്ഷിക്കാൻ ജനങ്ങളെ പ്രീണിപ്പിക്കണോ, അതോ പാർട്ടിയുടെ സാമ്പത്തിക സ്രോതസ്സായ മുതലാളിമാരെ സംരക്ഷിക്കണോ എന്നറിയാതെ കേന്ദ്ര സർക്കാർ ഇരുട്ടിൽ തപ്പുന്ന കാഴ്ചയാണ് ഒടുവിൽ അവശേഷിച്ചത്.

​എത്തനോൾ ഉത്പാദനം വെട്ടിച്ചുരുക്കിയതോടെ മില്ലുകൾ കരിമ്പ് സംഭരണം വൈകിപ്പിക്കുകയും കുടിശ്ശിക വിതരണം തടഞ്ഞുവെക്കുകയും ചെയ്തത് കർഷകരെ അക്ഷരാർത്ഥത്തിൽ തെരുവിലിറക്കി. ബാങ്കുകളിൽ നിന്നും വായ്പയെടുത്ത് കൃഷിയിറക്കിയ സാധാരണ കർഷകർ, ഉൽപ്പന്നം വിറ്റഴിക്കാൻ കഴിയാതെയും അർഹമായ വില ലഭിക്കാതെയും കടുത്ത സാമ്പത്തിക തകർച്ചയിലേക്കാണ് വീണത്.

ജനങ്ങളുടെ വിശപ്പിനേക്കാൾ വലുതല്ല കോർപ്പറേറ്റുകളുടെ വാഹനങ്ങളിലെ ഇന്ധനമെന്ന അടിസ്ഥാന പാഠം ബിജെപി സർക്കാർ ഇനിയെങ്കിലും മനസ്സിലാക്കേണ്ടതുണ്ട്. കോർപ്പറേറ്റുകളുടെ ലാഭത്തിനും തിരഞ്ഞെടുപ്പ് ഫണ്ടിനും വേണ്ടി രാജ്യത്തെ അന്നമൂട്ടുന്ന കർഷകന്റെയും പട്ടിണിപ്പാവങ്ങളുടെയും നെഞ്ചത്തടിക്കുന്ന ഈ വികലമായ നയം തിരുത്താൻ തയ്യാറായില്ലെങ്കിൽ സമാനതകളില്ലാത്ത പ്രത്യാഘാതങ്ങളാകും ബിജെപി സർക്കാരിനെ കാത്തിരിക്കുന്നത്