കൗണ്ടി 11നെതിരായ മൂന്ന് ദിന സന്നാഹ മത്സരത്തിലാണ് ഇംഗ്ലണ്ട് പര്യനത്തിലുള്ള ഇന്ത്യ. മത്സരത്തില്‍ കെ.എല്‍ രാഹുലിന്റെ സെഞ്ച്വറി പ്രകടനം (101) ഇന്ത്യയ്ക്ക് ഭേദപ്പെട്ട സ്‌കോര്‍ സമ്മാനിച്ചത്. മത്സരത്തില്‍ ബാറ്റ് ചെയ്യുന്നതിനിടെ രാഹുല്‍ ചെയ്‌തൊരു പ്രവര്‍ത്തിയ്ക്ക് കൈയടിക്കുകയാണ് ക്രിക്കറ്റ് ലോകം.
ക്രീസില്‍ ബാറ്റ് ചെയ്യാനായി നില്‍ക്കെ രാഹുലിന്റെ കൈയില്‍ നിന്ന് ക്യാപ് താഴെ വീണു. തിരികെ ക്യാപ് എടുത്തതിന് ശേഷം ക്യാപ് ചുംബിച്ചതോടെയാണ് രാഹുല്‍ ആരാധകരുടെ കൈയടി നേടുന്നത്. താരത്തിന്റെ രാജ്യസ്നേഹമാണ് ഈ പ്രവര്‍ത്തിയിലൂടെ വെളിവായതെന്നാണ് ആരാധകര്‍ പറയുന്നത്.
ആദ്യം ബാറ്റ് ചെയ്ത ഇന്ത്യ നേടിയ 311 റണ്‍സെന്ന ഒന്നാം ഇന്നിംഗ്സ് സ്‌കോറിന് മറുപടിക്കിറങ്ങിയ കൗണ്ടി 11 രണ്ടാം ദിനം കളി നിര്‍ത്തുമ്പോള്‍ ഒമ്പത് വിക്കറ്റ് നഷ്ടത്തില്‍ 220 എന്ന നിലയിലാണ്. ഒരു വിക്കറ്റ് ശേഷിക്കെ ഇന്ത്യയുടെ സ്‌കോറിനെക്കാള്‍ 91 റണ്‍സ് പിന്നിലാണ് കൗണ്ടി 11നുള്ളത്.
ഓപ്പണര്‍ ഹസീബ് ഹമീദിന്റെ (112) സെഞ്ച്വറിയാണ് കൗണ്ടി 11നെ വന്‍ തകര്‍ച്ചയില്‍ നിന്ന് രക്ഷിച്ചത്. ഇന്ത്യയ്ക്കായി ഉമേഷ് യാദവ് 15 ഓവറില്‍ 22 റണ്‍സ് മാത്രം വിട്ടുകൊടുത്ത് മൂന്ന് വിക്കറ്റുകള്‍ വീഴ്ത്തി. മുഹമ്മദ് സിറാജ് 13 ഓവറില്‍ 32 റണ്‍സ് വഴങ്ങി രണ്ട് വിക്കറ്റും സ്വന്തമാക്കി. ജസ്പ്രീത് ബുംറ 15 ഓവറില്‍ 29 റണ്‍സ് വിട്ടുകൊടുത്ത് ഒരു വിക്കറ്റാണ് വീഴ്ത്തിയത്. ശര്‍ദുല്‍ താക്കൂര്‍, രവീന്ദ്ര ജഡേജ, അക്ഷര്‍ പട്ടേല്‍ എന്നിവരെല്ലാം ഓരോ വിക്കറ്റു വീതം വീഴ്ത്തി.