വിരമിക്കൽ പ്രഖ്യാപിച്ച് ദിവസങ്ങൾക്ക് ശേഷം, ശിഖർ ധവാൻ താൻ ലെജൻഡ്‌സ് ലീഗ് ക്രിക്കറ്റിൽ (എൽഎൽസി) പങ്കെടുക്കാൻ ഒരുങ്ങുകയാണ് എന്ന് പറഞ്ഞിരിക്കുകയാണ്. ടൂർണമെൻ്റിൻ്റെ ഈ വർഷത്തെ എഡിഷൻ സെപ്റ്റംബർ മുതൽ ആരംഭിക്കും. അന്താരാഷ്ട്ര ക്രിക്കറ്റിൽ നിന്നും ആഭ്യന്തര ക്രിക്കറ്റിൽ നിന്നും വിരമിക്കുന്നതായി ധവാൻ ശനിയാഴ്ച അറിയിച്ചിരുന്നു.
ലെജൻഡ്‌സ് ലീഗ് ക്രിക്കറ്റിൽ പഴയ സഹതാരങ്ങളുമായി വീണ്ടും ഒന്നിക്കാനുള്ള സാധ്യതയിൽ ധവാൻ ആവേശം പ്രകടിപ്പിച്ചു. ക്രിക്കറ്റ് തൻ്റെ ജീവിതത്തിൻ്റെ അവിഭാജ്യ ഘടകമാണെന്നും കളിക്കുന്നത് തുടരുന്നതിൽ സന്തോഷമുണ്ടെന്നും തീപാറുന്ന സൗത്ത്പാവ് അവകാശപ്പെട്ടു.
“എൻ്റെ ശരീരം ഇപ്പോഴും കളിയുടെ ആവശ്യങ്ങൾക്ക് വിധേയമാണ്, എൻ്റെ തീരുമാനത്തിൽ ഞാൻ ഉറച്ചുനിൽക്കുമ്പോൾ, ക്രിക്കറ്റ് എന്റെ ജീവിതത്തിന്റെ അവിഭാജ്യ ഘടകമാണ്. അത് എന്നിൽ നിന്ന് ഒരിക്കലും പുറത്തുപോകില്ല. എൻ്റെ ക്രിക്കറ്റ് സുഹൃത്തുക്കളുമായി വീണ്ടും ഒത്തുചേരാനും ഞങ്ങൾ ഒരുമിച്ച് പുതിയ ഓർമ്മകൾ സൃഷ്ടിക്കുമ്പോൾ എൻ്റെ ആരാധകരെ രസിപ്പിക്കാനും ഞാൻ ആഗ്രഹിക്കുന്നു, ”ശിഖർ ധവാൻ പറഞ്ഞു.
167 ഏകദിനങ്ങളിൽ നിന്ന് 17 സെഞ്ചുറികളും 35 അർധസെഞ്ചുറികളും ഉൾപ്പെടെ 6793 റൺസാണ് ധവാൻ നേടിയത്. 122 ഫസ്റ്റ് ക്ലാസ് മത്സരങ്ങളിൽ നിന്നായി 8499 റൺസാണ് താരത്തിന്റെ സമ്പാദ്യം. 2022ൽ ബംഗ്ലാദേശിനെതിരെയാണ് അദ്ദേഹം ഇന്ത്യക്കായി അവസാന ഏകദിനം കളിച്ചത്.
