രൂക്ഷമായ സാമ്പത്തിക പ്രതിസന്ധിയാണ് പാകിസ്ഥാന്‍ നേരിടുന്നത്. സാമ്പത്തിക പ്രതിസന്ധിയ്ക്ക് പിന്നാലെ പാകിസ്ഥാനില്‍ പാസ്‌പോര്‍ട്ട് അച്ചടി നിറുത്തിവച്ചു. പാസ്‌പോര്‍ട്ട് അച്ചടിക്കുന്നതിനാവശ്യമായ ലാമിനേഷന്‍ പേപ്പര്‍ വാങ്ങാന്‍ പോലും പണമില്ലാതായതിനാലാണ് അച്ചടി നിറുത്തി വച്ചതെന്നാണ് പുറത്തുവരുന്ന റിപ്പോര്‍ട്ടുകള്‍.
ഇതേ തുടര്‍ന്ന് രാജ്യത്ത് വിദ്യാര്‍ത്ഥികളും തൊഴിലാളികളും വിദേശത്ത് പോകാന്‍ കാത്തിരിക്കുകയാണ്. എന്നാല്‍ പുതിയ പാസ്‌പോര്‍ട്ട് ലഭിക്കാന്‍ കാലതാമസം നേരിടുന്നത് വിദ്യാര്‍ത്ഥികളെയും തൊഴിലാളികളെയും പ്രതിസന്ധിയിലാക്കിയിട്ടുണ്ട്. ഉടന്‍തന്നെ പരിഹാരം കാണുമെന്ന് അധികൃതര്‍ അറിയിക്കുന്നുണ്ടെങ്കിലും പാസ്‌പോര്‍ട്ട് ഓഫീസുകള്‍ ഇത് സംബന്ധിച്ച് കൃത്യമായ വിവരം നല്‍കുന്നില്ല.
ഫ്രാന്‍സില്‍ നിന്നാണ് അച്ചടിയ്ക്കാവശ്യമായ ലാമിനേഷന്‍ പേപ്പറുകള്‍ പാകിസ്ഥാന്‍ എത്തിച്ചിരുന്നത്. പ്രതിദിനം മൂവായിരത്തില്‍ കൂടുതല്‍ പാസ്‌പോര്‍ട്ടുകള്‍ വിതരണം നടന്നിരുന്ന സ്ഥാനത്ത് നിലവില്‍ പതിമൂന്നെണ്ണത്തില്‍ കുറവ് പാസ്‌പോര്‍ട്ടുകളേ വിതരണം ചെയ്യാന്‍ സാധിക്കുന്നുള്ളൂ. പ്രതിസന്ധി എത്രയും വേഗം പരിഹരിക്കുമെന്നാണ് സര്‍ക്കാര്‍ പറയുന്നത്.