ഇന്ത്യൻ സൈന്യത്തിന് പിന്തുണയുമായി തമിഴ്‌നാട് മുഖ്യമന്ത്രി എംകെ സ്റ്റാലിൻ. പാകിസ്ഥാൻ നടത്തുന്ന ഭീകരാക്രമണങ്ങൾക്ക് എതിരെയും സൈന്യത്തിന് പിന്തുണ നൽകിയും ഐക്യദാർഢ്യം പ്രഖ്യാപിക്കുന്നതിനുമായി സ്റ്റാലിൻ മെയ് 10 ന് ചെന്നൈയിൽ റാലിക്ക് നേതൃത്വം നൽകും. രാജ്യത്തിന്റെ സായുധ സേനയ്ക്ക് പിന്തുണ നൽകണമെന്ന് സ്റ്റാലിൻ പൊതുജനങ്ങളോട് അഭ്യർത്ഥിച്ചു.
പാകിസ്ഥാന്റെ നിയമ ലംഘനങ്ങൾക്കും ഭീകരാക്രമണങ്ങൾക്കുമെതിരെ ധീരതയോടെ നടപടി സ്വീകരിക്കുന്ന ഇന്ത്യൻ സൈന്യത്തിന് ഐക്യവും പിന്തുണയും പ്രകടിപ്പിക്കേണ്ട സമയമാണിതെന്ന് സ്റ്റാലിൻ പ്രസ്താവനയിൽ പറഞ്ഞു. മെയ് 10 ന് വൈകുന്നേരം 5 മണിക്ക് സ്റ്റാലിന്റെ നേതൃത്വത്തിൽ നടക്കുന്ന റാലി ഡയറക്ടർ ജനറൽ ഓഫ് പോലീസിന്റെ ഓഫീസിൽ നിന്ന് ആരംഭിച്ച് യുദ്ധ സ്മാരകത്തിൽ സമാപിക്കും.
മുൻ സൈനികർ, മന്ത്രിമാർ, പൊതുജനങ്ങൾ, വിദ്യാർത്ഥികൾ എന്നിവർ റാലിയിൽ പങ്കെടുക്കും. ഇന്ത്യൻ സൈന്യത്തിന്റെ വീര്യത്തിനും ത്യാഗത്തിനും സമർപ്പണത്തിനും പിന്തുണ നൽകുന്നതിനും രാജ്യത്തിന്റെ ഏകീകരണം ശക്തിപ്പെടുത്തുന്നതിനുമാണ് റാലി.