മലയാലപ്പുഴയില്‍ മന്ത്രവാദം നടത്തിയിരുന്ന സ്ത്രീയെ പൊലീസ് കസ്റ്റഡിയിലെടുത്തു. വാസന്തി അമ്മ മഠത്തിലെ ശോഭനയെയാണ് പൊലീസ് കസ്റ്റഡിയിലെടുത്തത്. പരാതി നല്‍കിയിട്ടും നടപടി സ്വീകരിക്കുന്നില്ലെന്നാരോപിച്ച് നാട്ടുകാരും യുവജന സംഘടനകളും വീട് ഉപരോധിച്ചതിനെത്തുടര്‍ന്നാണ് നടപടി.
മലയാലപ്പുഴ പുതിയപ്പാട് ഉള്ള വാസന്തി മഠം എന്ന സ്ഥലത്താണ് മന്ത്രവാദം നടന്നിരുന്നത്. ഈ കേന്ദ്രത്തെക്കുറിച്ച് മുന്‍പും നിരവധി പരാതികള്‍ കിട്ടിയിരുന്നു. നാട്ടുകാരും എതിര്‍ത്തിരുന്നു. ശോഭന കുട്ടിയെ ഉപയോഗിച്ച് മന്ത്രവാദം നടത്തുന്ന ദൃശ്യങ്ങള്‍ പുറത്തുവന്നിരുന്നു. ബാലന്‍ കുഴഞ്ഞുവീഴുന്നതും വീഡിയോയില്‍ കാണാം.
ഈ കേന്ദ്രത്തില്‍ വര്‍ഷങ്ങളായി കുട്ടികളെ ഉപയോഗിച്ച് പൂജ ചെയ്യുന്നുണ്ടെന്ന് നാട്ടുകാര്‍ പറഞ്ഞു. ഇവരെ എതിര്‍ക്കുന്നവരെയൊക്കെ വീടിനുമുന്‍പില്‍ പൂവ് ഇട്ട് നാല്‍പ്പത്തിയൊന്നാം ദിവസം മരിച്ചുപോകുമെന്ന് പറഞ്ഞ് ഭീഷണിപ്പെടുത്തും. പൊലീസ് അന്വേഷണത്തിന് വരുമ്പോള്‍ ഉദ്യോഗസ്ഥരെ അസഭ്യം പറയും. ഗുണ്ടകളേയും ഇവര്‍ ഉപയോഗിച്ചിരുന്നുവെന്ന് നാട്ടുകാര്‍ പറഞ്ഞു.
ഇന്നു രാവിലെയാണ് വീടിന് മുന്നില്‍ പ്രതിഷേധം ആരംഭിച്ചത്. മഠത്തിലേക്ക് ഡിവൈഎഫ്‌ഐ മാര്‍ച്ച് നടത്തി. കോണ്‍ഗ്രസ്, ബിജെപി പ്രവര്‍ത്തകരും നാട്ടുകാരും പ്രതിഷേധിച്ചു.