വയനാട് പുനരധിവാസത്തിനായി സംസ്ഥാന സര്ക്കാരിന്റെ ഭൂമി ഏറ്റെടുക്കല് തടയണമെന്ന് ആവശ്യപ്പെട്ട് എല്സ്റ്റണ് എസ്റ്റേറ്റ് ഉടമകള് നല്കിയ ഹര്ജിയ്ക്ക് തിരിച്ചടി. എല്സ്റ്റണ് എസ്റ്റേറ്റ് ഉടമകള് നല്കിയ ഹര്ജി സുപ്രീം കോടതി തള്ളുകയായിരുന്നു. ജസ്റ്റിസുമാരായ സുബ്രമണ്യം പ്രസാദ്, ഹരീഷ് വൈദ്യനാഥന് ശങ്കര് എന്നിവര് ഉള്പ്പെട്ട ബഞ്ചിന്റേതാണ് തീരുമാനം.
ഹൈക്കോടതിയില് എസ്റ്റേറ്റ് സര്ക്കാരിന് കൈമാറുന്നതില് എതിര്പ്പില്ലെന്ന് ഉടമകള് വ്യക്തമാക്കിയിരുന്നു. അതിനാല് തര്ക്കം നഷ്ടപരിഹാര തുകയെ കുറിച്ച് മാത്രമാണെന്ന കോടതിയുടെ കണ്ടെത്തലിനെ തുടര്ന്നാണ് ഹര്ജി തള്ളിയത്. നേരത്തെ ഹൈക്കോടതിയുടെ ഇടക്കാല ഉത്തരവിന്റെ അടിസ്ഥാനത്തിലാണ് ഏറ്റെടുക്കല് നടപടി ആരംഭിച്ചത്.
ഇതിന് പിന്നാലെയാണ് എസ്റ്റേറ്റ് ഉടമകള് ഹര്ജിയുമായി സുപ്രീം കോടതിയെ സമീപിച്ചത്. ഏറ്റെടുക്കുന്ന എസ്റ്റേറ്റ് ഭൂമിയിലെ കെട്ടിടങ്ങള്, മരങ്ങള്, തേയില ചെടികള്, മറ്റ് കാര്ഷിക വിളകള് എല്ലാം കൂടി ചേര്ത്ത് 26.56 കോടി രൂപ നല്കാനാണ് സര്ക്കാര് തീരുമാനം. എന്നാല് ഏറ്റെടുക്കുന്ന എസ്റ്റേറ്റ് ഭൂമിക്ക് സര്ക്കാര് നിശ്ചയിച്ച വില വളരെ കുറവാണെന്നാണ് എല്സ്റ്റണ് എസ്റ്റേറ്റ് ഉടമകുളുടെ വാദം.
2013 ഭൂമി ഏറ്റെടുക്കല് നിയമത്തിലെ 26 -ാം വകുപ്പ് പ്രകാരം നഷ്ടപരിഹാര തുക കണക്കാക്കിയാല് ഇത് വളരെ കുറവായിരിക്കുമെന്നാണ് എല്സ്റ്റണ് എസ്റ്റേറ്റ് ഉടമകളുടെ വാദം. എല്സ്റ്റണ് എസ്റ്റേറ്റിന്റെ 78.73 ഹെക്ടര് ഭൂമിയാണ് ടൗണ്ഷിപ്പ് നിര്മ്മാണത്തിനായി സംസ്ഥാന സര്ക്കാര് ഏറ്റെടുക്കാന് നടപടി ആരംഭിച്ചത്.