സിപിഎമ്മിന് പിന്നാലെ സന്ദീപ് വാര്യരെ സ്വാഗതം ചെയ്ത് സിപിഐയും. ആശയം മാറ്റി പുതിയ ചിന്തയുമായി വന്നാല് ബിജെപി നേതാവ് സന്ദീപ് വാര്യരെ സ്വീകരിക്കാമെന്ന് സിപിഐ സംസ്ഥാന സെക്രട്ടറി ബിനോയ് വിശ്വം പറഞ്ഞു. ബിജെപിക്ക് സത്യവും ധര്മവും ഇല്ല. എല്ലാം ചീത്തപ്പണത്തിന്റെ ആള്ക്കാരാണെന്നും ബിനോയ് വിശ്വം കൂട്ടിച്ചേര്ത്തു.
പാലക്കാട് ഉപതിരഞ്ഞെടുപ്പ് തീയതി മാറ്റിയതിനെ സ്വാഗതം ചെയ്യുന്നുവെന്നും ബിനോയ് വിശ്വം വ്യക്തമാക്കി. ഇക്കാര്യം നേരത്തെ ആവശ്യപ്പെട്ടതാണ്. അപ്പോള് കേട്ടില്ല. ഇപ്പോളത് ഏതോ പാര്ട്ടിക്ക് വേണ്ടിയാണെന്ന കാര്യവും കേള്ക്കുന്നു. ഇലക്ഷന് കമ്മീഷന് ഇഷ്ടപ്പെട്ട പാര്ട്ടി അതാണെങ്കില് നല്ലതല്ലെന്നും ബിനോയ് വിശ്വം അഭിപ്രായപ്പെട്ടു.
മുനമ്പം വഖഫ് ബോര്ഡ് ഭൂമി തര്ക്കത്തിലും ബിനോയ് വിശ്വം അഭിപ്രായം രേഖപ്പെടുത്തി. മുനമ്പത്ത് വര്ഗീയ സംഘര്ഷത്തിനാണ് ചിലര് ശ്രമിക്കുന്നത്. അവിടെ നിന്ന് ഒരാളെയും കുടിയിറക്കാന് പാടില്ല. വഖഫ് ആയാലും ദേവസ്വം ബോര്ഡായാലും സര്ക്കാരിന് ഒരേ നിലപാടാണെന്നും ബിനോയ് വിശ്വം പ്രതികരിച്ചു.