സര്‍ക്കാരും ഗവര്‍ണറും തമ്മിലുള്ള തര്‍ക്കം രൂക്ഷമാകുന്നതിനിടയില്‍ ഗവര്‍ണറെ പുകഴ്ത്തി കായംകുളം എംഎല്‍എ യു പ്രതിഭ. രാഷ്ട്രീയമായി അഭിപ്രായ വ്യത്യാസങ്ങള്‍ ഉണ്ടെങ്കിലും ഗവര്‍ണറുടെ പെരുമാറ്റം മാതൃകാപരമാണെന്നായിരുന്നു എംഎല്‍എയുടെ പ്രതികരണം.
ഗവര്‍ണര്‍ എല്ലാവരോടും സ്നേഹത്തോടെയാണ് പെരുമാറുന്നത്. എല്ലാവരുടെയും കാര്യത്തില്‍ അദ്ദേഹത്തിന് വലിയ ശ്രദ്ധയാണെന്നും യു പ്രതിഭ പറഞ്ഞു. ഗവര്‍ണര്‍ പങ്കെടുത്ത ചെട്ടികുളങ്ങര ഹയര്‍സെക്കന്‍ഡറി സ്‌കൂള്‍ നവതി ആഘോഷ ചടങ്ങിലായിരുന്നു എംഎഎല്‍യുടെ പ്രതികരണം
ഗവര്‍ണര്‍ മലയാളം പഠിക്കാന്‍ കാണിക്കുന്ന ഉത്സാഹം കേരളീയ വേഷത്തോടുള്ള അദ്ദേഹത്തിന്റെ ഇഷ്ടവും പ്രശംസനീയമാണ്. ചെട്ടിക്കുളങ്ങര പഞ്ചായത്ത് പ്രസിഡന്റിന്റെ ആരോഗ്യനില മോശമാണെന്ന് പറഞ്ഞപ്പോള്‍, ഗവര്‍ണര്‍ വേദിയില്‍ നിന്ന് അദ്ദേഹത്തിന്റെ അടുത്തെത്തി വിശേഷങ്ങള്‍ ചോദിച്ചറിഞ്ഞെന്നും യു പ്രതിഭ പറഞ്ഞു.
എംഎല്‍എയുടെ പ്രശംസയ്ക്ക് ചിരിയോടെ ഗവര്‍ണര്‍ നന്ദി പ്രകടിപ്പിച്ചു. വിദ്യാഭ്യാസ മന്ത്രി വി ശിവന്‍കുട്ടിക്കും ചടങ്ങില്‍ ക്ഷണമുണ്ടായിരുന്നെങ്കിലും അദ്ദേഹത്തിന് എത്താന്‍ സാധിച്ചില്ല.
