കൊടകര കുഴല്പ്പണ കേസില് കേരള പൊലീസിന്റെ കണ്ടെത്തലുകളെ തള്ളി എന്ഫോഴ്സ്മെന്റ് ഡയറക്ടറേറ്റ്. കുഴല്പ്പണമെത്തിച്ചത് ബിജെപിയുടെ തിരഞ്ഞെടുപ്പ് പ്രചരണത്തിനല്ലെന്നാണ് ഇഡിയുടെ കണ്ടെത്തല്. കേസില് കോടതിയില് സമര്പ്പിച്ച കുറ്റപത്രത്തിലാണ് ഇഡിയുടെ നിര്ണായക കണ്ടെത്തലുള്ളത്.
കലൂര് പിഎംഎല്എ കോടതിയിലാണ് ഇഡി കുറ്റപത്രം സമര്പ്പിച്ചത്. കേസില് ആകെ 23 പ്രതികളാണുള്ളത്. കവര്ച്ച നടന്ന ശേഷം പണം ഏതൊക്കെ തരത്തില് വെളുപ്പിച്ചു എന്നതാണ് ഇഡി അന്വേഷിച്ചത്. ഇതിന്മേലുള്ള കുറ്റപത്രമാണ് ഇഡി സമര്പ്പിച്ചത്. മറ്റ് ദിശകളിലേക്ക് ഇഡി അന്വേഷണം പോയിട്ടില്ല.
2021 ഏപ്രില് 4ന് തൃശൂരിലെ കൊടകരയില് നടന്ന ഹൈവേ കവര്ച്ചയുമായി ബന്ധപ്പെട്ടാണ് കള്ളപ്പണ ഇടപാട് പുറത്തുവരുന്നത്. നിയമസഭാ തിരഞ്ഞെടുപ്പിന് മൂന്ന് നാള് മുന്പ്, 2021 ഏപ്രില് നാലിന് പുലര്ച്ചെ 4.40ന് ആണ് കൊടകരയില് വ്യാജ അപകടം ഉണ്ടാക്കി മൂന്നര കോടി രൂപ കവര്ന്നത്.
ഈ പണം ബിജെപിക്കായി എത്തിച്ചതാണെന്ന് പൊലീസിന്റെ അന്വേഷണ സംഘം കണ്ടെത്തിയിരുന്നു. കേസില് 23 പേരെ അറസ്റ്റ് ചെയ്തിരുന്നു. അതേസമയം കവര്ന്നതില് 1.4 കോടി രൂപ എവിടെയെന്ന് കണ്ടെത്താന് ഇതുവരെ സാധിച്ചിട്ടില്ല.