മട്ടന്നൂര് തിരഞ്ഞെടുപ്പിലെ തോല്വിയുടെ ജാള്യത മറച്ചുവെക്കാന് യുഡിഎഫ് വ്യാജപ്രചാരണം നടത്തുന്നുവെന്ന് മുന് മന്ത്രിയും എംഎല്എയുമായ കെ കെ ശൈലജ. താന് വോട്ട് ചെയ്ത വാര്ഡില് എല്ഡിഎഫ് തോറ്റെന്നാണ് പ്രചാരണം. എന്നാല് ഇവിടെ എല്ഡിഎഫ് സ്ഥാനാര്ത്ഥി കെ രജത 661 വോട്ടു നേടി വിജയിച്ചു.
രണ്ടാം സ്ഥാനത്തുള്ള യുഡിഎഫ് സ്ഥാനാര്ത്ഥിക്ക് മൂന്നക്കം തികയ്ക്കാന് പോലും കഴിഞ്ഞില്ല. മട്ടന്നൂര് നഗരസഭാ തിരഞ്ഞെടുപ്പില് ആറാം തവണയും തുടര്ച്ചയായി എല്ഡിഎഫ് ജയിച്ചതോടെയാണ് വ്യാജപ്രചരണം നടത്തുന്നതെന്നും ശൈലജ ഫെയ്സ്ബുക്കില് കുറിച്ചു.
ഫെയ്സ്ബുക്ക് കുറിപ്പിന്റെ പൂര്ണരൂപം:
മട്ടന്നൂര് നഗരസഭാ തെരഞ്ഞെടുപ്പില് ആറാം തവണയും തുടര്ച്ചയായി എല്ഡിഎഫ് ജയിച്ചതോടെ യുഡിഎഫ് കേന്ദ്രങ്ങള് വീണ്ടും വ്യാജ പ്രചാരണങ്ങള് തുടങ്ങി. ഞാന് വോട്ട് ചെയ്ത എന്റെ വാര്ഡില് എല്ഡിഎഫ് തോറ്റെന്നാണ് പ്രചാരണം.
എന്റെ വാര്ഡ് ഇടവേലിക്കല് ആണ്. എല്ഡിഎഫ് സ്ഥാനാര്ത്ഥി കെ രജത 661 വോട്ടാണ് ഈ തെരഞ്ഞെടുപ്പില് നേടിയത്. രണ്ടാം സ്ഥാനത്തുള്ള യുഡിഎഫ് സ്ഥാനാര്ത്ഥിക്ക് മൂന്നക്കം തികയ്ക്കാന് പോലും കഴിഞ്ഞില്ല കേവലം 81 വോട്ടാണ് യുഡിഎഫിനായി പോള് ചെയ്തത് എല്ഡിഎഫിന്റെ ഭൂരിപക്ഷം 580. എന്നിട്ടും യുഡിഎഫ് വിജയിച്ചുവെന്നൊക്കെയുള്ള പ്രചാരണം തോല്വിയിലുള്ള ജാള്യത മറച്ചു പിടിക്കാനാണ്.