മോഹന്ലാലിനും മമ്മൂട്ടിക്കും പിന്നിലായി ഇരിക്കുന്ന ടൊവിനോ തോമസിന്റെയും ബേസില് ജോസഫിന്റെയും ചിത്രങ്ങള് സോഷ്യല് മീഡിയയുടെ ശ്രദ്ധ നേടുകയാണ്. എമ്പുരാന് ടീസര് ലോഞ്ചിന്റെയും ആശിര്വാദ് സിനിമാസിന്റെയും വാര്ഷികാഘോഷ ചടങ്ങില് നിന്നെടുത്ത ചിത്രങ്ങള് ‘വന്മരങ്ങള്ക്കിടയില്’ എന്ന ക്യാപ്ഷനോടെ ടൊവിനോയാണ് ഇന്സ്റ്റഗ്രാമില് പങ്കുവച്ചത്. പിന്നാലെ എത്തിയ ബേസിലിന്റെ കമന്റ് ആണ് വൈറലായിരിക്കുന്നത്.
‘മുട്ട പഫ്സിലെ മുട്ട’ എന്നായിരുന്നു ബേസിലിന്റെ കമന്റ്. പിന്നാലെ രസകരമായ മറുപടികളുമായി ആരാധകരുമെത്തി. രണ്ട് പേരും ഇനി സ്വയം എയറിലേക്ക് പോവുകയാണോ എന്നാണ് സോഷ്യല് മീഡിയ ചോദിക്കുന്നത്. ‘അടുത്ത യൂണിവേഴ്സ് തുടങ്ങാനുള്ള പരിപാടി ആണോ’ എന്നായിരുന്നു മറ്റൊരു കമന്റ്. ‘ഭാവി വന്മരങ്ങളെന്നും’ ‘ഇടവിള കൃഷി ആണോ’ എന്നുമൊക്കെ കമന്റുകള് എത്തുന്നുണ്ട്.
അതേസമയം, മലയാളത്തിലെ പ്രമുഖ താരങ്ങളെല്ലാം പങ്കെടുത്ത വലിയ പരിപാടിയിലാണ് എമ്പുരാന് ടീസര് റിലീസ് ചെയ്തത്. മമ്മൂട്ടിയാണ് ചിത്രത്തിന്റെ ടീസര് ലോഞ്ച് നടത്തിയത്. ഷാജി കൈലാസ്, ജോഷി, മഞ്ജു വാര്യര്, സാനിയ അയ്യപ്പന്, അനൂപ് മേനോന് തുടങ്ങി നിരവധി പേരാണ് ചടങ്ങിന് എത്തിയത്.
മാര്ച്ച് 27ന് ആണ് എമ്പുരാന് റിലീസ് ചെയ്യുന്നത്. അബ്രാം ഖുറേഷിയായുള്ള മോഹന്ലാലിന്റെ രണ്ടാം പകര്ന്നാട്ടം കാണാന് ആംകാംക്ഷയോടെയാണ് ആരാധകര് കാത്തിരിക്കുന്നത്. സ്റ്റീഫന് നെടുമ്പള്ളി എങ്ങനെ അബ്രാം ഖുറേഷിയായി എന്നത് എമ്പുരാനിലുണ്ടാകും എന്നാണ് ആരാധകര് പ്രതീക്ഷിക്കുന്നത്.