മലയാള സിനിമയിലെ ഒരു കാലഘട്ടം മുഴുവൻ നായികാ കഥാപാത്രങ്ങളെ അവിസ്മരണീയമാക്കിയ നടിയാണ് സംഗീത മാധവൻ. താരം മലയാളത്തിൽ വീണ്ടും സജീവമാകുകയാണ്. ‘ആനന്ദ് ശ്രീബാല’ ‘പരാക്രമം’ എന്നിവയാണ് താരത്തിന്റെ പുതിയ ചിത്രങ്ങൾ. ഇപ്പോഴിതാ കുടുംബത്തിനായാണ് താൻ സിനിമാജീവിതത്തിൽ നിന്നും ഇടവേളയെടുത്തതെന്ന് തുറന്നുപറയുകയാണ് താരം.
ഏറ്റവും പുതിയ ചിത്രമായ പരാക്രമത്തിൻ്റെ വിശേഷങ്ങൾ ഒരു യൂട്യൂബ് ചാനലുമായി പങ്കുവയ്ക്കുന്നതിനിടയിലാണ് സംഗീത സിനിമയിലേക്കുളള തിരിച്ചുവരവിനെക്കുറിച്ച് പങ്കുവച്ചത്. മകളോടൊപ്പം സമയം ചെലവഴിക്കുമ്പോൾ താനൊരു നടിയായിരുന്നുവെന്നുപോലും മറന്നുപോയിട്ടുണ്ടെന്നും സിനിമയിൽ സജീവമായ സമയത്തും മകളോടൊപ്പം യാത്ര ചെയ്തപ്പോഴും അഭിനയിക്കാൻ കഴിയാതെ പോയ ഒരുപാട് ചിത്രങ്ങളുണ്ടായിരുന്നുവെന്നും താരം പറയുന്നു.
അതേസമയം തന്റെ സിനിമാജീവിതത്തിൽ എക്കാലത്തും നന്ദിയോടെ ഓർക്കാൻ കഴിയുന്ന ഒരു വ്യക്തിയാണ് ശ്രീനിവാസനെന്നും താരം പറയുന്നു. അദ്ദേഹത്തിൻ്റെ അനുഗ്രഹം എനിക്ക് എന്നും വേണമെന്ന് എപ്പോഴും തോന്നാറുണ്ട്. അദ്ദേഹത്തോടൊപ്പം ചിന്താവിഷ്ടയായ ശ്യാമളയിൽ അഭിനയിക്കുമ്പോൾ ഞാൻ ചെറുപ്പമായിരുന്നു. അപ്പോൾ ആ കഥാപാത്രത്തിന്റെ ആഴമൊന്നും മനസിലായിരുന്നില്ല. സംവിധായകൻ പറഞ്ഞത് അതുപോലെ അഭിനയിച്ചു. പക്ഷെ ഇപ്പോഴാണ് ഞാൻ ആ കഥാപാത്രം ചെയ്തിരുന്നതെങ്കിൽ കുറച്ചും കൂടി മനോഹരമാക്കാമായിരുന്നു.
മലയാള സിനിമയിൽ തന്നെ എനിക്ക് ഏറെ ആരാധന തോന്നിയ വ്യക്തിയാണ് ശ്രീനിവാസൻ. ബുദ്ധിയുള്ള നടൻ എന്നുവേണമെങ്കിൽ പറയാം. സിനിമാജീവിതത്തിൽ ഞാൻ നല്ലൊരു ഇടവേള എടുത്തിരുന്നു. ചിലപ്പോഴൊക്കെ ഞാനൊരു അഭിനേത്രിയായിരുന്നുവെന്ന് മറന്നുപോയ സമയങ്ങളുണ്ട്. പുറത്തെവിടെയെങ്കിലും പോകുമ്പോൾ എന്നെ ആളുകൾ ശ്യാമള അല്ലേയെന്ന് ചോദിക്കുമ്പോഴാണ് ഞാൻ പഴയകാലം ഓർക്കുന്നത്. ഒരു സമയത്ത് മകളുടെ എല്ലാ കാര്യങ്ങളും നോക്കി ജീവിച്ചപ്പോൾ സമയം തീരെ കിട്ടിയില്ല. പിന്നെ അവൾ പഠിക്കാനും ജോലി സംബന്ധമായ കാര്യങ്ങൾക്കും വിദേശത്ത് പോയതോടെ എന്തോ ശൂന്യത ജീവിതത്തിൽ അനുഭവപ്പെട്ടു. അപ്പോഴാണ് പുതിയ വേഷങ്ങൾ എന്നെ തേടി വന്നത്. വീണ്ടും സിനിമയിൽ എത്തിയത് അങ്ങനെയായിരുന്നു. ഇനി സിനിമയിൽ സജീവമാകാനാണ് തീരുമാനമെന്നും സംഗീത പറയുന്നു.
‘ചിന്താവിഷ്ടയായ ശ്യാമള’ എന്ന സിനിമയിലെ കഥാപാത്രമായിട്ടാണ് ഇന്നും സംഗീത മലയാളി പ്രേക്ഷക മനസ്സുകളിൽ ജീവിക്കുന്നത്. അന്ന് മികച്ച നടിയ്ക്കുള്ള സംസ്ഥാന പുരസ്കാരവും ഈ ചിത്രത്തിലെ അഭിനയത്തിന് സംഗീതയ്ക്ക് ലഭിച്ചിരുന്നു. 2000-ൽ അഭിനയം നിർത്തിയ താരം 14 വർഷത്തിനു ശേഷം മടങ്ങി വന്ന ചിത്രമായിരുന്നു ശ്രീനിവാസൻ നായകനായ ‘നഗര വാരിധി നടുവിൽ ഞാൻ’. പിന്നീട് 47ാം വയസ്സിൽ ‘ചാവേർ’ എന്ന ചിത്രത്തിലൂടെയാണ് താരം മലയാളത്തിൽ വീണ്ടും എത്തുന്നത്. ഇപ്പോഴിതാ മലയാള സിനിമയിൽ സജീവമാകാൻ ഒരുങ്ങുകയാണ് താരം.