തമിഴകത്ത് നിന്നും വമ്പന്‍ റിലീസ് ആയി സ്റ്റൈല്‍മന്നന്റെ ‘ജയിലര്‍’ എത്തുകയാണ്. ഓഗസ്റ്റ് 10ന് റിലീസിന് ഒരുങ്ങുന്ന ചിത്രത്തിന് വന്‍ പ്രീ റിലീസ് ഹൈപ്പ് ആണ് ലഭിച്ചിട്ടുള്ളത്. ചിത്രത്തെ കുറിച്ചുള്ള സംഗീത സംവിധായകന്‍ അനിരുദ്ധ് രവചന്ദറിന്റെ വാക്കുകളാണ് ഇപ്പോള്‍ ശ്രദ്ധ നേടുന്നത്.
വാക്കുകളൊന്നുമില്ലാതെ ഇമോജികളിലൂടെയാണ് അനിരുദ്ധിന്റെ ട്വീറ്റ്. ജയിലര്‍ എന്ന പേരിന് ശേഷം മൂന്ന് തരം ഇമോജികളാണ് അദ്ദേഹം ഉപയോഗിച്ചിരിക്കുന്നത്. വെടിക്കെട്ടിനെ സൂചിപ്പിക്കുന്നത്, ട്രോഫി, കൈയടി എന്നിങ്ങനെയാണ് ഇമോജികള്‍.
ജയിലറിന്റെ ആദ്യ റിവ്യൂ എന്ന പേരില്‍ പ്രമുഖ ട്രേഡ് അനലിസ്റ്റുകളും ചിത്രത്തിന്റെ തന്നെ ട്വിറ്റര്‍ ഹാന്‍ഡിലുമെല്ലാം ഈ ട്വീറ്റ് പങ്കുവച്ചിട്ടുണ്ട്. ഒരു മണിക്കൂറിനകം 11,000 ല്‍ അധികം ലൈക്കുകളാണ് ട്വീറ്റിന് ലഭിച്ചിരിക്കുന്നത്. ‘വിക്ര’ത്തിന് ശേഷം അടുത്ത കാലത്ത് അനിരുദ്ധ് വലിയ പബ്ലിസിറ്റി കൊടുക്കുന്ന ചിത്രമാണ് ജയിലറെന്ന അഭിപ്രായവും ട്വിറ്ററില്‍ ഉയരുന്നുണ്ട്.
ഇത് വലിയ പ്രതീക്ഷയാണ് പകരുന്നതെന്നും ആരാധകരും പറയുന്നു. അതേസമയം, രജനികാന്തിന്റെ 169-ാം ചിത്രമാണ് ജയിലര്‍. രജനികാന്തും മോഹന്‍ലാലും ആദ്യമായി ഒന്നിക്കുന്നു എന്നത് തന്നെയാണ് ജയിലര്‍ ചിത്രത്തിന്റെ ഒരു പ്രധാന ആകര്‍ഷണം. ചിത്രത്തില്‍ കാമിയോ റോളിലാണ് മോഹന്‍ലാല്‍ എത്തുന്നത്.
മുത്തുവേല്‍ പാണ്ഡ്യന്‍ എന്ന കഥാപാത്രത്തെയാണ് ജയിലറില്‍ രജനികാന്ത് അവതരിപ്പിക്കുന്നത്. സുനില്‍, രമ്യ കൃഷ്ണന്‍, ജാക്കി ഷ്റോഫ്, യോഗി ബാബു എന്നിവരെ കാണാം. ശിവ് രാജ്കുമാര്‍ കാമിയോ റോളിലെത്തും. ഹിറ്റ് അടിക്കുമെന്ന് ഉറപ്പിച്ചാണ് ഇത്തവണ നെല്‍സണ്‍ എത്തുന്നത് എന്നാണ് ട്രെയ്ലറില്‍ നിന്നുള്ള സൂചന.