തനിക്ക് നേരെയുണ്ടായ അതിക്രമങ്ങളെക്കുറിച്ച് തുറന്നുപറഞ്ഞ് നടി ഭാവന രംഗത്ത് വന്നത് ആഗോളതലത്തില് ശ്രദ്ധ നേടിയിരിക്കുകയാണ്. ഇപ്പോഴിതാ ഭാവനയുടെ വാക്കുകള് റഷ്യന് ഭരണകൂട മാധ്യമമായ സ്പുട്നിക്ക് പങ്കുവെച്ചിരിക്കുകയാണ്.
‘ചിതറിത്തെറിച്ചത് എന്റെ അഭിമാനമാണ്, തിരിച്ചു പിടിക്കും’ എന്ന ഭാവനയുടെ വാക്കുകള് തലകെട്ടാക്കിയാണ് സ്പുട്നിക് വാര്ത്ത നല്കിയിരിക്കുന്നത്. ഭാവനയുടെ തുറന്നു പറച്ചിലിന് തൊട്ടുപിന്നാലെ തന്നെ ദേശീയ തലത്തില് ഏറെ ചര്ച്ച ചെയ്യപ്പെട്ടിരുന്നു.
വനിതാ ദിനത്തോട് അനുബന്ധിച്ച് പ്രശസ്ത മാധ്യമ പ്രവര്ത്തക ബര്ഖാ ദത്ത് ‘വി ദ വുമന് ഓഫ് ഏഷ്യ’ കൂട്ടായ്മയോടൊപ്പം ചേര്ന്ന് നടത്തുന്ന ‘ഗ്ലോബല് ടൗണ് ഹാള്’ പരിപാടിയിലായിരുന്നു ഭാവനയുടെ പ്രതികരണം.
ആക്രമണം നേരിട്ട ശേഷം തന്റെ ജീവിതം മാറി മറഞ്ഞത്, ഇരയെന്ന പേരിട്ട് മുഖ്യധാരയില് നിന്നും തന്റെ പേര് തന്നെ അപ്രത്യക്ഷമായത്, സിനിമാ മേഖലയില് നിന്നുണ്ടായ മോശം പ്രതികരണങ്ങളും പിന്തുണയും എന്നിവയെക്കുറിച്ചാണ് ഭാവന സംസാരിച്ചത്.