സത്യന്‍ അന്തിക്കാടിനും മോഹന്‍ലാലിനൊപ്പമുള്ള ചിത്രം പങ്കുവച്ച തിരക്കഥാകൃത്ത് ഇക്ബാല്‍ കുറ്റിപ്പുറത്തിന്റെ പോസ്റ്റ് സോഷ്യല്‍ മീഡിയയില്‍ ചര്‍ച്ചയായിരുന്നു. മലയാള സിനിമയിലെ ഹിറ്റ് കൂട്ടുകെട്ടായ സത്യന്‍ അന്തിക്കാടും മോഹന്‍ലാലും വര്‍ഷങ്ങള്‍ക്ക് ശേഷം വീണ്ടും ഒന്നിക്കുന്നു എന്ന ചര്‍ച്ചകളാണ് ആരാധകര്‍ക്കിടയില്‍ നടക്കുന്നത്.
എന്നാല്‍ ഇപ്പോള്‍ ഒരുങ്ങുന്നത് ഒരു മോഹന്‍ലാല്‍ ചിത്രമല്ല എന്ന് വ്യക്തമാക്കിയിരിക്കുകയാണ് സത്യന്‍ അന്തിക്കാട്. തൃശൂരിലെ ഒരു ഹോട്ടലില്‍ ഇരുന്ന് താനും ഇക്ബാല്‍ കുറ്റിപ്പുറവും ഒരു സ്‌ക്രിപ്റ്റ് വര്‍ക്ക് ചെയ്യുകയായിരുന്നു. മോഹന്‍ലാല്‍ തൃശൂര്‍ വഴി പോയപ്പോള്‍ തന്നെ കാണാനായി വന്നു. ഒരു ചായ കുടിച്ചു പോയത് മാത്രമാണ് എന്നാണ് സത്യന്‍ അന്തിക്കാട് റിപ്പോര്‍ട്ടര്‍ ലൈവിനോട് പ്രതികരിച്ചത്.
സെന്‍ട്രല്‍ പിക്‌ചേഴ്‌സിന് വേണ്ടിയാണ് ഇപ്പോള്‍ തിരക്കഥ ഒരുക്കുന്നത്. ജൂണ്‍ അവസാനത്തോടെ അതിന്റെ ഷൂട്ടിംഗ് ആരംഭിക്കും. ഫെയ്‌സ്ബുക്ക് പോസ്റ്റ് കണ്ട് പലരും വിളിക്കുന്നുണ്ട്. താനിവിടെ ഉണ്ടെന്ന് പറഞ്ഞപ്പോള്‍ സൗഹൃദ സന്ദര്‍ശനത്തിന് എത്തിയതായിരുന്നു അദ്ദേഹം.മോഹന്‍ലാലുമായി ഒരു സിനിമയുണ്ടാകും. എന്നാല്‍ ഇത് അതിന് വേണ്ടിയല്ല.
തന്റെ സിനിമകളായ അച്ചുവിന്റെ അമ്മ, വീണ്ടും ചില വീട്ടുകാര്യങ്ങള്‍ പോലെ ഒരു കുടുംബ ചിത്രമായിരിക്കും ഇത്. അതിന്റെ കാസ്റ്റിംഗ് അനൗണ്‍സ് ചെയ്യാറായിട്ടില്ല. അതില്‍ മോഹന്‍ലാല്‍ ആയിരിക്കില്ല നായകന്‍ എന്നും സത്യന്‍ അന്തിക്കാട് വ്യക്തമാക്കി.