ഛായാഗ്രാഹകന് വേണു ഷൂട്ടിംഗ് സെറ്റിലെ പ്രശ്നക്കാരനാണെന്ന് നടനും സംവിധായകനുമായ ലാല്. എന്നാല് അദ്ദേഹത്തിന്റെ പ്രശ്നങ്ങള് എല്ലാം ന്യായത്തിന് വേണ്ടിയാണെന്നും താരം പറയുന്നു. ലാലിസം എന്ന പരിപാടിയില് വിയറ്റ്നാം കോളനി എന്ന ചിത്രത്തെക്കുറിച്ചുള്ള ഓര്മകള് പങ്കുവെക്കുന്നതിനിടയില് ലാലിന്റെ വാക്കുകള്.
മോഹന്ലാല് ആണ് വേണുവിന്റെ ദേഷ്യത്തെ കുറിച്ച് ആദ്യം പറയുന്നത്. സെറ്റില് ഷൂട്ടിംഗ് വേണു എന്നല്ല, ഷൗട്ടിംഗ് വേണു എന്നാണ് പറയുക എന്നാണ് മോഹന്ലാല് പറഞ്ഞത്. സിദ്ദിഖ്-ലാല് സംവിധാനം ചെയ്ത മോഹന്ലാല് ചിത്രം വിയറ്റ്നാം കോളനിയുടെ ഛായാഗ്രാഹകന് വേണു ആയിരുന്നു.
വേണു അടിസ്ഥാനപരമായി ഒരു കമ്യൂണിസ്റ്റുകാരനാണ്. എപ്പോഴും ന്യായത്തിന് വേണ്ടിയും തൊഴിലാളികള്ക്ക് വേണ്ടിയും ഒക്കെ ആയിരിക്കും വേണു പറയുക. സെറ്റില് പണിയെടുക്കുന്ന ഒരാള്ക്ക് ഭക്ഷണം ശരിയായിട്ട് കിട്ടിയില്ല എന്ന പ്രശ്നത്തിലൊക്കെ ആയിരിക്കും ചിലപ്പോള് ഷൂട്ടിംഗ് മുടക്കുന്നതൊക്കെ.
ശബ്ദം ബഹളവുമൊക്കെ ഉണ്ടാക്കി, പ്രൊഡ്യൂസറെ ചീത്ത പറഞ്ഞ്, അടിക്കാന് പോയി… അങ്ങനെ പ്രശ്നങ്ങള് ഉണ്ടാക്കുന്നത് സിനിമയില് എല്ലാവരും നിസാരമെന്ന് തള്ളിക്കളയുന്ന, വളരെ ന്യായമായ കാര്യങ്ങള്ക്കായിരിക്കും. തന്റെ അടുത്ത സുഹൃത്തുക്കളില് ഒരാളായ വേണു ഏറ്റവും കൂടുതല് വര്ക്ക് ചെയ്തിട്ടുള്ളത് തനിക്കൊപ്പമാണെന്നും ലാല് പറഞ്ഞു.