ഇന്ത്യന്‍ സൂപ്പര്‍ ലീഗില്‍ ഒഡീഷ എഫ്‌സിയ്‌ക്കെതിരെ നിര്‍ണായക പോരാട്ടത്തിന് കേരള ബ്ലാസ്റ്റേഴ്സ് ഇറങ്ങുക രണ്ടും കല്‍പിച്ച്. പരിക്കും തുടര്‍തോല്‍വികളും മൂലം ആരാധകരെ നിരാശയിലാഴ്ത്തിയ ബ്ലാസ്റ്റേഴ്സ് ഇന്ന് വിജയത്തില്‍ കുറഞ്ഞതൊന്നും പ്രതീക്ഷിക്കുന്നില്ല.
ആദ്യ മത്സരത്തില്‍ എടികെയെ 2-1 ന് തോല്‍പിച്ച ശേഷമാണ് “പതിവ് പോലെ” ബ്ലാസ്റ്റേഴ്സ് തോറ്റു തുടങ്ങിയത്. രണ്ടാം മത്സരത്തില്‍ മുംബൈ സിറ്റിയോടും, മൂന്നാം മത്സരത്തില്‍ ഹൈദരാബാദ് എഫ് സി യോടും ബ്ലാസ്റ്റേഴ്സ് തോല്‍ക്കുകയായിരുന്നു. ഇതില്‍ മുംബൈക്കെതിരെ സ്വന്തം ഗ്രൗണ്ടിലും, ഹൈദരാബാദിനെതിരെ, എതിര്‍ തട്ടകത്തിലുമായിരുന്നു പരാജയങ്ങള്‍.
ഇതോടെ് ഏറെ വിമര്‍ശനങ്ങളേല്‍ക്കുന്ന ടീമിന് ലീഗിലേക്ക് തിരിച്ചുവരാന്‍ വിജയം അനിവാര്യമാണ്. അതിനാല്‍ തന്നെ രണ്ടും കല്‍പിച്ചാകും കേരള ടീം ഇറങ്ങുക. എന്നാല്‍ പരിക്കാണ് ബ്ലാസ്റ്റേഴ്‌സിനെ ഏറെ വലയ്ക്കുന്നത്. പോയ മത്സരത്തില്‍ പരിക്കേറ്റ ജിയാനി സ്യൂവര്‍ലോണ്‍ ഇന്ന് കളിക്കില്ലെന്നാണ് സൂചന. പ്രതിരോധത്തിലെ പ്രധാനിയായ സ്വ്യൂവര്‍ലോണ്‍ കളിച്ചില്ലെങ്കില്‍ ടീമിന് കനത്ത തിരിച്ചടിയാണത്.
നാല് മലയാളി താരങ്ങള്‍ ഇന്ന് ആദ്യ ഇലവനില്‍ ഇടം പിടിച്ചേക്കും. ഗോള്‍ വലയ്ക്ക് താഴെ ടിപി രഹനേഷ് എത്തും ഇതിന് പുറമേ മലയാളി താരങ്ങളായ രാഹുല്‍, പ്രശാന്ത്, സഹല്‍ എന്നിവരും ആദ്യ ഇലവനില്‍ ഉണ്ടാകും. ജെസല്‍ കര്‍നെയ് റോ, ജൈറോ റൊഡ്രീഗസ്, മൊഹമ്മദ് റാക്കിപ്പ്, രാജു ഗെയിക്ക്വാദ് എന്നിവര്‍ പ്രതിരോധക്കോട്ട കെട്ടും. സിഡോഞ്ചയും, മുസ്തഫ ഗ്‌നിംഗും മധ്യനിരയിലെത്തും. നായകന്‍ ബാര്‍ത്തലോമ്യൂ ഒഗ്‌ബെച്ചി തന്നെയാകും ഇന്നും മുന്നേറ്റത്തില്‍.