പാപ്പരാസികളുടെ പ്രചരണങ്ങള്‍ക്കും ഗോസിപ്പുകള്‍ക്കും വിരാമം കുറിച്ച് കഴിഞ്ഞ ദിവസമാണ് ഇന്ത്യന്‍ ക്രിക്കറ്റ് ടീം ക്യാപ്റ്റന്‍ വിരാട് കോഹ്ലിയും ബോളിവുഡ് സുന്ദരി അനുഷ്‌ക ശര്‍മയും വിവാഹിതരായത്. ദീര്‍ഘകാലം പ്രണയത്തിലായിരുന്ന ഇവര്‍ ഇറ്റലിയില്‍ വെച്ചാണ് മംഗല്യം ചാര്‍ത്തിയത്. ലോകത്തിലെ ഏറ്റവും മികച്ച ക്രിക്കറ്റ് താരങ്ങളില്‍ ഒരാളും ഏറ്റവും ബ്രാന്‍ഡ് മൂല്യമുള്ള ക്രിക്കറ്റ് താരവുമായ കോഹ്ലിയും അനുഷ്‌ക്കയും ഒന്നിച്ചപ്പോള്‍ ലോകത്തിന്റെ വിവിധ ഭാഗങ്ങളില്‍ നിന്ന് ആശംസകളുടെ പെരുമഴയായിരുന്നു.
ഇന്ത്യന്‍ ടെന്നീസ് താരം സാനിയ മിര്‍സയുടെ ആശംസയാണ് ഇതില്‍ വ്യത്യസ്തമായത്. അനുഷ്‌ക്കയും വിരാടും ജോഡി നമ്പര്‍ വണ്‍ ആണെന്ന് പറഞ്ഞ സാനിയ മീഡിയ ഹൈപ്പ് ശ്രദ്ധിക്കണമെന്ന നിര്‍ദേശമാണ് ദമ്പതികള്‍ക്ക് നല്‍കിയിരിക്കുന്നത്. ഇന്ത്യയില്‍ വിവാഹം നടത്തിയാല്‍ മാധ്യമങ്ങളിലുണ്ടാക്കുന്ന പുകില് കണ്ടിട്ടാണ് അവര്‍ ഇറ്റലിയില്‍ പോയി വിവാഹിതരായത്. ദീര്‍ഘകാലമായി അവര്‍ പ്രണയത്തിലായിരുന്ന കാര്യം എല്ലാവര്‍ക്കുമറിയാം. എങ്കിലും വിവാഹിതരാകുമ്പോള്‍ മീഡിയ ഹൈപ്പുണ്ടാകുമെന്ന കാര്യം തീര്‍ച്ചയാണ്. സാനിയ വ്യക്തമാക്കി.
പാക്കിസ്ഥാന്‍ ക്രിക്കറ്റ് താരം ശുഹൈബ് മാലിക്കുമായുള്ള വിവാഹ സമയത്തും മാധ്യമങ്ങള്‍ വമ്പന്‍ ഹൈപ്പുണ്ടാക്കിയിരുന്നു. സെലിബ്രിറ്റികള്‍ തമ്മിലുള്ളി വിവാഹം എപ്പോഴും സങ്കീര്‍ണമാണ്. അതുകൊണ്ട് തന്നെ മാധ്യമങ്ങളെ ഇവര്‍ക്ക് ഒരു സമയത്ത് നേരിടേണ്ടി വരുമെന്ന കാര്യത്തില്‍ സംശയമില്ല. സാനിയ മിര്‍സ കൂട്ടിച്ചേര്‍ത്തു.