ഇന്ത്യൻ ക്രിക്കറ്റ് ടീമിനെ സംബന്ധിച്ച് മികച്ച ക്രിക്കറ്റ് താരങ്ങളുടെ ഒരു കൂട്ടായ്മയാൽ എന്നും രാജ്യം സമ്പന്നമായിരുന്നു. ഒത്തിരി ഇതിഹാസങ്ങൾ രാജ്യത്തിന് ഈ കാലഘട്ടത്തിൽ ഉണ്ടായിട്ടും ഉണ്ട്. എന്നിട്ടും അവർ അർഹിക്കുന്നുണ്ടെന്ന് പലരും വിശ്വസിക്കുന്ന വിടവാങ്ങൽ മത്സരങ്ങൾ ഈ താരങ്ങൾക്ക് ലഭിച്ചില്ല. എം എസ് ധോണി, യുവരാജ് സിംഗ്, സുരേഷ് റെയ്‌ന, ശിഖർ ധവാൻ തുടങ്ങിയ നാല് ഇതിഹാസങ്ങൾക്കും വിടവാങ്ങൽ മത്സരങ്ങൾ ലഭിച്ചില്ല.
എംഎസ് ധോണി – ക്യാപ്റ്റൻ കൂൾ
ശാന്തമായ സ്വഭാവത്തിനും തന്ത്രപരമായ തീരുമാനങ്ങൾ എടുക്കാനും മിടുക്കനായ എംഎസ് ധോണി, 2007 ടി20 ലോകകപ്പും 2011ലെ ഏകദിന ലോകകപ്പും ഉൾപ്പെടെ ഇന്ത്യയെ നിരവധി വിജയങ്ങളിലേക്ക് നയിച്ചു. ന്യൂസിലൻഡിനെതിരായ 2019 ലോകകപ്പ് സെമി ഫൈനലായിരുന്നു അദ്ദേഹത്തിൻ്റെ അവസാന അന്താരാഷ്ട്ര മത്സരം. എന്നാൽ ഒരു വർഷത്തിന് ശേഷം അദ്ദേഹം വിരമിക്കൽ പ്രഖ്യാപിച്ചു. ധോണിയുടെ പെട്ടെന്നുള്ള വിരമിക്കൽ ഒരു ഞെട്ടലായിരുന്നു, ഒരു വിടവാങ്ങൽ മത്സരത്തിന് വേണ്ടി അവസരം വന്നിട്ടും അത് യാഥാർത്ഥ്യമായില്ല. എന്തായാലും ഇന്ത്യ കണ്ട ഏറ്റവും മികച്ച താരത്തിന് വിടവാങ്ങൽ ലഭിക്കാതെ പോയത് നിരാശയായി.
യുവരാജ് സിംഗ്
ലോകം കണ്ട ഏറ്റവും മികച്ച താരങ്ങളിൽ ഒരാളായ യുവരാജ് സിംഗിനും ഒരു വിടവാങ്ങൽ മത്സരം ലഭിച്ചില്ല. ക്യാൻസറിനെതിരായ പോരാട്ടങ്ങളിലൂടെയും ശ്രദ്ധേയമായ തിരിച്ചുവരവിലൂടെയും അദ്ദേഹത്തിൻ്റെ കരിയർ കയറ്റിറക്കങ്ങൾ നിറഞ്ഞത് ആയിരുന്നു. 2017-ലായിരുന്നു അദ്ദേഹത്തിൻ്റെ അവസാന അന്താരാഷ്ട്ര മത്സരം. ധോണി കാരണമാണ് അദ്ദേഹത്തിന് വിടവാങ്ങൽ കിട്ടാത്തത് എന്നാണ് യുവി ആരാധകർ വിശ്വസിക്കുന്നത് .
സുരേഷ് റെയ്‌ന
പലപ്പോഴും ധോണിയുടെ നിഴലായി നിന്ന സുരേഷ് റെയ്‌ന ഇന്ത്യയുടെ പല വിജയങ്ങളിലും നിർണായക പങ്ക് വഹിച്ചു. അദ്ദേഹത്തിൻ്റെ അവസാന അന്താരാഷ്ട്ര മത്സരവും 2018-ൽ ആയിരുന്നു, ധോണിയെപ്പോലെ, സോഷ്യൽ മീഡിയയിൽ തൻ്റെ വിരമിക്കൽ പ്രഖ്യാപിച്ചു. റെയ്‌നയുടെ കരിയർ സ്ഥിരതയാർന്ന പ്രകടനങ്ങളാൽ നിറഞ്ഞിരുന്നു, എന്നിട്ടും അദ്ദേഹത്തിനും ഒരു വിടവാങ്ങൽ മത്സരം നിഷേധിക്കപ്പെട്ടു.
ശിഖർ ധവാൻ
ഇന്ത്യൻ ക്രിക്കറ്റിലെ ഏറ്റവും മികച്ച താരങ്ങളിൽ ഒരാളായ ശിഖർ ധവാൻ താൻ അന്താരാഷ്ട്ര ക്രിക്കറ്റിൽ നിന്ന് വിരമിക്കുകയാണെന്ന് പ്രഖ്യാപിച്ചിരിക്കുകയാണ്. സോഷ്യൽ മീഡിയ പോസ്റ്റിലൂടെയാണ് ശിഖർ തന്റെ തീരുമാനം ലോകത്തെ അറിയിച്ചത്. ഓപ്പണിങ് ബാറ്റർ എന്ന നിലയിൽ ഇന്ത്യയെ അനേകം വിജയങ്ങളിലേക്ക് നയിച്ച ഇന്നിങ്‌സുകൾ കളിച്ചിട്ടുള്ള താരത്തിന്റെ പെട്ടെന്നുള്ള തീരുമാനം എന്തായാലും ആരാധകർക്ക് ഞെട്ടലുണ്ടാക്കി എന്ന് പറയാം.
ഓസ്ട്രേലിയക്കെതിരെ 2010-ൽ ഇന്ത്യക്കായി ആദ്യ ഏകദിനം കളിച്ച ശിഖർ 2013 മാർച്ച് 14-ന് ഓസ്ട്രേലിയക്കെതിരെ മൊഹാലിയിൽ ടെസ്റ്റ് ക്രിക്കറ്റിൽ അരങ്ങേറ്റം കുറിച്ചു. ടെസ്റ്റിന്റെ മൂന്നാം ദിവസം ടെസ്റ്റിൽ ഇന്ത്യയുടെ ഒന്നാം ഇന്നിഗ്സിൽ 85 പന്തിൽ 100 റൺസ് കടന്ന ശിഖർ ടെസ്റ്റ് ക്രിക്കറ്റിൽ അരങ്ങേറ്റ മത്സരത്തിൽ ഏറ്റവും വേഗത്തിൽ സെഞ്ച്വറി നേടുന്ന താരമെന്ന ബഹുമതി സ്വന്തമാക്കിയിരുന്നു. അർഹിച്ച വിരമിക്കൽ താരത്തിനും ലഭിച്ചില്ല.