2025 ലെ ഇന്ത്യയുടെ ഐസിസി ചാമ്പ്യൻസ് ട്രോഫി വിജയത്തിൽ സ്റ്റാർ വിക്കറ്റ് കീപ്പർ ബാറ്റർ കെഎൽ രാഹുൽ നിർണായക പങ്ക് വഹിച്ചു. ഓസ്‌ട്രേലിയയ്‌ക്കെതിരായ സെമിഫൈനലിലും ന്യൂസിലൻഡിനെതിരായ ഫൈനലിലും കെഎൽ രാഹുലിന്റെ അപരാജിത പ്രകടനം ഇന്ത്യയെ അവരുടെ മൂന്നാം ഐസിസി ചാമ്പ്യൻസ് ട്രോഫി കിരീടം നേടാൻ സഹായിച്ചു.
2025 ലെ ഐസിസി ചാമ്പ്യൻസ് ട്രോഫി പൂർത്തിയതോടെ , മാർച്ച് 22 ന് ആരംഭിക്കാനിരിക്കുന്ന ഇന്ത്യൻ പ്രീമിയർ ലീഗിന്റെ (ഐപിഎൽ) വരാനിരിക്കുന്ന പതിപ്പിലേക്ക് എല്ലാ ശ്രദ്ധയും മാറുന്നു. നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്‌സും (കെകെആർ) റോയൽ ചലഞ്ചേഴ്‌സ് ബെംഗളൂരുവും (ആർസിബി) ഐപിഎൽ 2025 ഉദ്ഘാടന മത്സരത്തിൽ കൊൽക്കത്തയിലെ ഐക്കണിക് ഈഡൻ ഗാർഡൻസിൽ ഏറ്റുമുട്ടും.
രാഹുലിനെ സംബന്ധിച്ച് കഴിഞ്ഞ സീസൺ വരെ ഭാഗമായ ലക്നൗ വിട്ടതോടെ ഇപ്പോൾ ഡൽഹി ക്യാപിറ്റൽസ് ടീമിൻറെ ഭാഗമാണ് താരം. 2025 ലെ ഐപിഎൽ മെഗാ ലേലത്തിൽ ഡൽഹി ക്യാപിറ്റൽസ് (ഡിസി) കർണാടക ബാറ്റ്‌സ്മാനെ 14 കോടി രൂപയ്ക്ക് സ്വന്തമാക്കി. മെഗാ ലേലത്തിൽ ഡൽഹിയുടെ ഏറ്റവും വിലയേറിയ കളിക്കാരനായിരുന്നു രാഹുൽ. ഐപിഎല്ലിൽ ഇതുവരെ 132 മത്സരങ്ങൾ കളിച്ചിട്ടുള്ള അദ്ദേഹം, നാല് സെഞ്ച്വറിയും 37 അർദ്ധസെഞ്ച്വറിയും ഉൾപ്പെടെ 4683 റൺസ് നേടിയിട്ടുണ്ട്.
എന്നിരുന്നാലും, സീസണിന്റെ തുടക്കത്തിൽ രാഹുലിന്റെ ലഭ്യതയെക്കുറിച്ച് അനിശ്ചിതത്വം നിലനിൽക്കുന്നു. ഇംഗ്ലണ്ട് താരം ഹാരി ബ്രൂക്ക് ഐപിഎൽ 2025 ൽ നിന്ന് പിന്മാറിയതോടെ ഡിസിക്ക് ഇതിനകം തന്നെ വലിയ തിരിച്ചടി നേരിട്ടിട്ടുണ്ട്. ഇപ്പോൾ പുറത്തുവരുന്ന റിപ്പോർട്ടുകൾ പ്രകാരം ആദ്യ കുഞ്ഞിന്റെ ജനനത്തോട് അനുബന്ധിച്ച്‌ രാഹുൽ തുടക്കത്തിലേ രണ്ട് മത്സരങ്ങളിൽ നിന്ന് മാറി നിന്നേക്കും.
ഇതുവരെ ക്യാപ്റ്റനെ പ്രഖ്യാപിക്കാത്ത ടീമായ ഡൽഹി വരും ദിവസങ്ങളിൽ തന്നെ പ്രഖ്യാപനം നടത്തുമെന്ന് കരുതപ്പെടുന്നു. രാഹുലും അക്‌സർ പട്ടേലും തമ്മിലാണ് ക്യാപ്റ്റന്സിക്ക് വേണ്ടിയുള്ള മത്സരം നടക്കുന്നത്.