വിന്‍ഡീസ് പര്യടനത്തിനുള്ള ഇന്ത്യന്‍ ക്രിക്കറ്റ് ടീമിന്റെ ഷെഡ്യൂള്‍ പുറത്ത്. മൂന്നു ഏകദിനങ്ങളും അഞ്ചു ടി20കളുമാണ് ഇന്ത്യയുടെ വിന്‍ഡീസ് പര്യടനത്തിനുള്ളത്. ആറു മല്‍സരങ്ങള്‍ വിന്‍ഡീസിലും രണ്ടു കളികള്‍ അമേരിക്കയിലുമായിട്ടാണ് നടക്കുക. ഇത് സംബന്ധിച്ച ഔദ്യോഗിക പ്രഖ്യാപനം ഉടനുണ്ടാകും.
ജൂലൈ അവസാനം മുതല്‍ ആഗസ്റ്റ് ആദ്യവാരം വരെയാണ് ഇന്ത്യയുടെ വിന്‍ഡീസ് പര്യടനം. ജൂലൈ 22 നു തുടങ്ങുന്ന പര്യടനം ആഗസ്റ്റ് ഏഴിനു അവസാനിക്കും. ഏകദിന പരമ്പരയാണ് ആദ്യം നടക്കുന്നത്. ജൂലൈ 22, 24, 27 തിയതികളിലായി ട്രിനിഡാഡിലെ ക്വീന്‍സ് പാര്‍ക്ക് ഓവലിലായിരിക്കും ഈ മല്‍സരങ്ങള്‍.
ഏകദിന പരമ്പരയ്ക്ക് ശേഷം അഞ്ചു മല്‍സരങ്ങളുടെ ടി20 പരമ്പര നടക്കും. ആദ്യ ടി20 ജൂലൈ 29നു ബ്രയാന്‍ ചാള്‍സ് ലാറ സ്റ്റേഡിയത്തിലും അതിനു ശേഷമുള്ള രണ്ടു മല്‍സരങ്ങള്‍ ആഗസ്റ്റ് ഒന്ന്, രണ്ട് തിയതികളിലായി സെന്റ് കിറ്റ്സിലെ വാര്‍നര്‍ പാര്‍ക്ക്, നെവിസ് എന്നിവിടങ്ങളിലായിട്ടും നടക്കും.
നാലാമത്തെയും അഞ്ചാമത്തെയും ടി20 മത്സരങ്ങളാണ് അമേരിക്കയില്‍ നടക്കുക. ആഗസ്റ്റ് ആറ്, ഏഴ് തിയ്യതികളിലായി ഫ്‌ളോറിഡയാണ് ഈ പോരാട്ടങ്ങള്‍ക്ക് വേദിയാവുക. അമേരിക്കയില്‍ നിന്നും ക്ലിയറന്‍സ് ലഭിച്ച ശേഷമേ ഷെഡ്യൂള്‍ ഔദ്യോഗികമായി പ്രഖ്യാപിക്കു.