വരാനിരിക്കുന്ന ശ്രീലങ്കൻ പര്യടനത്തിൽ നിന്നും ടീമിലിടം കിട്ടാതെ പുറത്തായ വെറ്ററൻ ഓപ്പണർ ശിഖർ ധവാൻ തന്റെ വർക്കൗട്ടിന്റെയും നെറ്റ് സെഷനുകളുടെയും ദൃശ്യങ്ങൾ ഉൾക്കൊള്ളുന്ന ഒരു വീഡിയോ സോഷ്യൽ മീഡിയയിൽ പങ്കിട്ടു. ഡിസംബർ 28 ബുധനാഴ്ച തന്റെ ഔദ്യോഗിക ഇൻസ്റ്റാഗ്രാം ഹാൻഡിൽ പോസ്റ്റ് ചെയ്ത വിഡിയോയിൽ ശ്രദ്ധേയമായ ഒരു അടിക്കുറിപ്പും ഉണ്ടായിരുന്നു.
കഴിഞ്ഞ കുറച്ച് പരമ്പരകളിലായി പ്രതീക്ഷിച്ച പ്രകടനം പുറത്തെടുക്കുന്നതിൽ ധവാൻ പരാജയപ്പെട്ടതിനാൽ തന്നെ ഇത്തരത്തിൽ ഉള്ള ഒരു തീരുമാനം പ്രതീക്ഷിച്ചിരുന്നു എന്ന് തന്നെ പറയാം. ഒരുപക്ഷെ താരത്തിന് ഇനി മറ്റൊരു അവസരം കിട്ടാനുള്ള സാധ്യതയും കുറവാണെന്നാണ് ആരാധകർ ഇതുമായി ബന്ധപെട്ട് പറയുന്നത്.
തന്നെ പുറത്താക്കിയതുമായി ബന്ധപ്പെട്ട് പ്രതികരിച്ച ഡൽഹി ക്രിക്കറ്റ് താരം സോഷ്യൽ മീഡിയയിൽ ഒരു വീഡിയോ പോസ്റ്റ് ചെയ്തു, അതിൽ അദ്ദേഹം തന്റെ ബാറ്റിംഗിലും ഫിറ്റ്നസിലും പ്രവർത്തിക്കുന്നതായി കാണാം. അതിലെ അടിക്കുറിപ്പ് ഇങ്ങനെ:
“അത് ജയിക്കുകയോ തോൽക്കുകയോ അല്ല, ധൈര്യമാണ്. നാം നമ്മുടെ ജോലി ചെയ്യണം; ബാക്കി ദൈവത്തിന്റെ കൈകളിലാണ്.”
എന്തായാലും ഇന്ത്യൻ പ്രീമിയർ ലീഗിലെ പഞ്ചാബിനെ നയിക്കുന്ന ധവാൻ മികച്ച പ്രകടനത്തിലൂടെ ഒരു തിരിച്ചുവരവ് സ്വപ്നം കാണുന്നു.