ഒരു പാകിസ്ഥാന്‍ ആങ്കറുടെ വിചിത്രമായ താരതമ്യം കണ്ട് സ്തബ്ധരാക്കിയിരിക്കുകയാണ് ക്രിക്കറ്റ് ലോകം. പാകിസ്ഥാന്‍ ക്രിക്കറ്റിലെ നിലവിലെ സൂപ്പര്‍ താരം ബാബര്‍ അസമിനെ ക്രിക്കറ്റ് ദൈവം സച്ചിന്‍ ടെണ്ടുല്‍ക്കറുമായി താരതമ്യം ചെയ്യാമോ എന്ന ചോദ്യമാണ് ക്രിക്കറ്റ് ലോകത്തെ അലോസരപ്പെടുത്തിയിരിക്കുന്നത്. പാകിസ്ഥാനിലെ അറിയപ്പെടുന്ന യൂട്യൂബറും ക്രിക്കറ്റ് എഴുത്തുകാരനും ക്രിക്കറ്റ് അനാലിസ്റ്റുമായ വാസി ഹബീബിനോടായിരുന്നു പാക് ആങ്കറുടെ ഈ ചോദ്യം. ഇതിനെ രൂക്ഷഭാഷയിലാണ് ഹബീബ് നേരിട്ടത്.
ആദ്യം നിങ്ങള്‍ ബാബര്‍ ആസമിനെ വിരാട് കോലിയുമായി താരതമ്യം ചെയ്തു, പിന്നെ ശുഭ്മന്‍ ഗില്ലുമായും താരതമ്യം ചെയ്തു. ഇപ്പോള്‍ നിങ്ങള്‍ സച്ചിന്‍ ടെണ്ടുല്‍ക്കറിലേക്കു ചാടിയിരിക്കുകയാണ്. സച്ചിന്‍ ടെണ്ടുല്‍ക്കര്‍ കളിക്കുന്നത് നിങ്ങള്‍ കണ്ടിട്ടുണ്ടോ? ദയവായി ദൈവത്തെ ഭയപ്പെടണം. ദയവു ചെയ്ത് എന്നോട് ഈ തരത്തിലുള്ള ചോദ്യങ്ങള്‍ ചോദിക്കരുത്.
ബാബര്‍ ആസം എന്റെ നാട്ടില്‍ നിന്നുള്ള കളിക്കാരനാണ്. ബാബറിന്റെ ബാറ്റിങിലെ റേഞ്ച്, സമീപനം എന്നിവയെക്കുറിച്ചാണ് ഞാന്‍ സംസാരിക്കുന്നത്. അദ്ദേഹം ക്ലാസിക് ബാറ്ററാണെന്നു തന്നെയാണ് എന്റെ അഭിപ്രായം. മനോഹരമായി ഷോട്ടുകള്‍ കളിക്കുന്നയാളുമാണ്. പക്ഷെ ബാറ്റിംഗിലെ സൗന്ദര്യമല്ല എനിക്കു വേണ്ടത്, കളി ജയിപ്പിക്കുകയാണ് പ്രധാനം- ഹബീബ് വ്യക്തമാക്കി.
ബാബര്‍ ആസവുമായി ബന്ധപ്പെട്ട ഒരു ചര്‍ച്ചയില്‍ പങ്കെടുക്കാനായിരുന്നു ഹബീബ് എത്തിയത്. ഇതിനിടെയായിരുന്നു ബാബറിനെയും സച്ചിനെയും ഒന്നു താരതമ്യം ചെയ്യാമോയെന്നു പാക് ആങ്കര്‍ അദ്ദേഹത്തോടു ചോദിച്ചത്.