കേരളത്തില്‍ മതധ്രുവീകരണത്തിലൂടെ നേട്ടംകൊയ്യാനാണ് ബിജെപി നീക്കമെന്ന് സിപി എം സംസ്ഥാന സെക്രട്ടറി എം വി ഗോവിന്ദന്‍. വര്‍ഗീയതയ്ക്കെതിരെ സന്ധിയില്ലാത്ത പോരാട്ടമുണ്ടാകേണ്ട കാലമാണിത്. ന്യൂനപക്ഷങ്ങളെ തങ്ങള്‍ക്ക് അനുകൂലമാക്കിമാറ്റാനുള്ള ശ്രമത്തിന്റെ ഭാഗമായാണ് മുസ്ലിം, ക്രിസ്ത്യന്‍ സംഘടനകളുമായുള്ള ചര്‍ച്ച.
റബറിന് വിലകൂടുമെന്നു പറഞ്ഞ് ബിജെപിക്കുപിറകെ പോകുന്നവര്‍ വഞ്ചിക്കപ്പെടും. ആരെങ്കിലും പറയുന്നതിനോ ചെയ്യുന്നതിനോ അനുസരിച്ച് വില മാറില്ല. ആസിയാന്‍ കരാറിന്റെ ഭാഗമായാണ് വിലയിടിഞ്ഞത്. കുത്തകകള്‍ക്ക് അനുകൂലമായ നിലപാട് സ്വീകരിക്കുന്ന ബിജെപി സര്‍ക്കാര്‍ കര്‍ഷകരെ രക്ഷിക്കുമെന്ന് ധരിക്കുന്നവര്‍ പാഠംപഠിക്കും.
കേരളത്തിലെ മതമൈത്രിയില്‍ വിഷം കലര്‍ത്താനാണ് ബിജെപി ശ്രമിക്കുന്നത്. കേരളത്തെപ്പോലെ മതങ്ങള്‍ ഐക്യത്തോടെ കഴിയുന്ന പ്രദേശം എവിടെയുമില്ല. ഹിന്ദു, മുസ്ലിം, ക്രിസ്ത്യന്‍ വിഭാഗങ്ങള്‍ രമ്യതയോടെ കഴിയുന്നത് ദഹിക്കാത്ത ബിജെപിയും ആര്‍എസ്എസ്സും ന്യൂനപക്ഷ വര്‍ഗീയവാദികളും നാടിന്റെ മതനിരപേക്ഷത തകര്‍ക്കുകയാണ്.