തിരഞ്ഞെടുപ്പ് നടക്കാനിരിക്കുന്ന നിലമ്പൂരില് കോണ്ഗ്രസ് നേതാക്കളുടെ വാഹനത്തില് പരിശോധന. ഇന്നലെ രാത്രി 10 മണിയോടെയായിരുന്നു പരിശോധന. ഷാഫി പറമ്പില്, രാഹുല് മാങ്കൂട്ടത്തില് എന്നിവരുടെ വാഹനത്തിലാണ് പൊലീസ് പരിശോധന നടത്തിയത്. പെട്ടിയില് വസ്ത്രങ്ങളും പുസ്തകങ്ങളുമാണ് ഉണ്ടായിരുന്നത്.
നിലമ്പൂര് വടപുറത്ത് വച്ചായിരുന്നു നടപടി. ഷാഫി പറമ്പിലാണ് വാഹനം ഓടിച്ചിരുന്നത്. ഒപ്പം രാഹുല് മാങ്കൂട്ടത്തിലുമുണ്ടായിരുന്നു. നിലമ്പൂര് നഗരത്തിലേക്ക് വരികയായിരുന്നു ഇരുവരും. വാഹനത്തില് ഉണ്ടായിരുന്ന പെട്ടി തുറന്ന് പൊലീസ് പരിശോധന നടത്തി. വസ്ത്രങ്ങളും പുസ്തകങ്ങളുമാണ് പെട്ടിയില് ഉണ്ടായിരുന്നത്.
അതേസമയം പരിശോധന ഏകപക്ഷീയമാണെന്ന് നേതാക്കള് ആരോപിച്ചു. പരിശോധന സമയത്ത് ഷാഫി പറമ്പിലും രാഹുല് മാങ്കൂട്ടത്തിലും പൊലീസിനോട് കയര്ത്തു. കോണ്ഗ്രസ് നേതാക്കളുടെ വാഹനങ്ങളിലും റൂമുകളിലും മാത്രമാണല്ലോ പരിശോധന എന്നായിരുന്നു പറഞ്ഞത്. തിരഞ്ഞെടുപ്പിന്റെ ഭാഗമായുള്ള സ്വാഭാവികമായ പരിശോധന എന്നാണ് വിശദീകരണം.