നോവലുകളിലൂടെയും സിനിമകളിലൂടെയും വായനക്കാരെയും പ്രേക്ഷകരെയും വിറപ്പിച്ച രക്തദാഹിയായ ഡ്രാക്കുള വീണ്ടും അവതരിക്കുന്നു. ടിവി സീരീസ് രൂപത്തിലാണ് ഡ്രാക്കുള വീണ്ടും ലോകത്തിന് മുമ്പിലേക്ക് എത്തുന്നത്. ബിബിസി ചാനലാണ് ഡ്രാക്കുളയുടെ ടിവി സീരീസുമായി എത്തുന്നത്. നെറ്റ്ഫ്‌ളിക്‌സാണ് സീരീസിന്റെ നിര്‍മ്മാതാക്കള്‍.
ഷെര്‍ലോക്ക് എന്ന സൂപ്പര്‍ഹിറ്റ് സീരിസിന്റെ മേക്കേര്‍സ് ആണ് ഡ്രാക്കുളയുടെ പിന്നണിയില്‍ പ്രവര്‍ത്തിക്കുന്നത്. മാര്‍ക് ഗറ്റിസ്, സ്റ്റിവെന്‍ മൊഫാറ്റ് എന്നിവര്‍ ചേര്‍ന്ന് തിരക്കഥയൊരുക്കുന്ന സീരീസ് മൂന്ന് ഭാഗങ്ങളായാവും എത്തുക. നടന്‍ ക്ലെയ്‌സ് ബാങാവും ഡ്രാക്കുളയെ അവതരിപ്പിക്കുക. സീരീസിന്റേതായി പുറത്തിറങ്ങിയ ടീസര്‍ ഇതിനോടകം ശ്രദ്ധ നേടി കഴിഞ്ഞു.
1897-ലാണ് വിശ്വവിഖ്യാതമായ ഡ്രാക്കുള എന്ന നോവല്‍ ആദ്യമായി പുറത്തിറങ്ങുന്നത്. ഐറിഷ് എഴുത്തുകാരനായ ബ്രാം സ്റ്റോക്കറുടെ ഭാവനയില്‍ പിറവി കൊണ്ട കഥാനായകനാണ് ഡ്രാക്കുള. 1931 ലാണ് ഡ്രാക്കുളയെ കുറിച്ചുള്ള ആദ്യ ചിത്രം പുറത്തിറങ്ങുന്നത്. പിന്നീട് പലപ്പോഴാണ് 220 ഓളം ചിത്രങ്ങള്‍ ഡ്രാക്കുള കഥാപാത്രമായി എത്തി. ഇതില്‍ ക്രിസ്റ്റഫര്‍ ലീ ഡ്രാക്കുളയായി അഭിനയിച്ച് 1958 ല്‍ പുറത്തിറങ്ങിയ ഹൊറര്‍ ഓഫ് ഡ്രാക്കുള ഏറെ പ്രസിദ്ധമാണ്.