തെന്നിന്ത്യൻ സിനിമ ലോകം പ്രതീക്ഷയോടെ നോക്കുന്ന സിനിമയാണ് സൂര്യയെ നായകനാക്കി സിരുത്തൈ ശിവ സംവിധാനം ചെയ്യുന്ന ‘കങ്കുവ’. ത്രീഡിയിൽ പാൻ ഇന്ത്യൻ ചിത്രമായാണ് കങ്കുവ ഒരുങ്ങുന്നത്.
ഇപ്പോഴിതാ സിനിമയെ കുറിച്ച് ശ്രദ്ധേയമായ അഭിപ്രായം പങ്കുവെച്ചിരിക്കുകയാണ് സംവിധായകന്റെ സഹോദരനും നടനുമായ ബാല. ഹോളിവുഡ് റേഞ്ചിലാണ് ചിത്രം എടുത്തിരിക്കുന്നത് എന്നാണ് ബാല പറയുന്നത്.
“കങ്കുവ ടെക്നിക്കലി ഹൈ അഡ്വാൻസ് സിനിമയാണ്. ഹോളിവുഡ് റേഞ്ചിലാണ് ചിത്രം എടുത്തിരിക്കുന്നത്. വേറൊരു വിശേഷം എന്തെന്നാൽ അതിൽ ത്രീഡിയുണ്ട്. ത്രീഡിയിൽ ഇത്രയും ഭാഷയിൽ റിലീസ് ചെയ്യുന്ന ആദ്യ ഇന്ത്യൻ ചിത്രമാണ് കങ്കുവ എന്നാണ് എനിക്ക് തോന്നുന്നത്. ഗംഭീര സിനിമയാണ്.” ഓൺലൈൻ മീഡിയകൾക്ക് നൽകിയ അഭിമുഖത്തിലാണ് ബാല ഇങ്ങനെ അഭിപ്രായപ്പെട്ടത്.
കങ്കുവ ഫാൻ മെയ്ഡ് പോസ്റ്റർ
സ്റ്റുഡിയോ ഗ്രീനിന്റെ ബാനറിൽ ഇ. വി ജ്ഞാനവേൽ രാജ നിർമ്മിക്കുന്ന ചിത്രത്തിന് തിരക്കഥയെഴുതിയിരിക്കുന്നത് ആദി നാരായണയാണ്. ദിശ പട്ടാണിയാണ് ചിത്രത്തിൽ സൂര്യയുടെ നായികയായി എത്തുന്നത്. ദേവി ശ്രീ പ്രസാദാണ് ചിത്രത്തിന് സംഗീതമൊരുക്കുന്നത്. അടുത്ത വർഷം പകുതിയോടെ ചിത്രം തീയേറ്ററുകളിൽ എത്തുമെന്നാണ് പ്രതീക്ഷിക്കുന്നത്.
ബിഗ് ബഡ്ജറ്റിൽ ഒരുങ്ങുന്ന ചിത്രം സൂര്യയുടെ കരിയറിലെ ഏറ്റവും വലിയ ചിത്രം കൂടിയാണ്. എന്ത് തന്നെയായാലും വരാനിരിക്കുന്നത് ഇന്ത്യൻ സിനിമ കാണാൻ പോവുന്ന വിസ്മയം തന്നെയാണ് എന്നാണ് ആരാധകർ കണക്കുകൂട്ടുന്നത്.