ചിറാപുഞ്ചി മഴയത്ത് എന്ന പാട്ടിലൂടെ അടുത്തിടെ സോഷ്യൽ മീഡിയയിൽ തരംഗമായ ഗായകനാണ് ഹനാൻഷാ. ഈ പാട്ട് ഉപയോഗിച്ച് നിരവധി റീൽസ് വീഡിയോകളാണ് ഇൻസ്റ്റഗ്രാമിൽ ഇറങ്ങിയത്. മഴക്കാലത്തിന് പറ്റിയ പാട്ട് എന്ന നിലയിലാണ് ആളുകൾ ഹനാന്റെ പാട്ട് ഏറ്റെടുത്തത്. ഇപ്പോഴിതാ ചിറാപുഞ്ചി മഴയത്ത് പാടി സിനിമയിൽ എത്തിയിരിക്കുകയാണ് ഗായകൻ. ആന്റണി വർഗീസ് പെപ്പെ നായകനാവുന്ന എറ്റവും പുതിയ ചിത്രമായ കാട്ടാളനിലാണ് ഹനാൻ ഒരു പ്രധാന റോളിൽ എത്തുന്നത്.
മാർക്കോ എന്ന ബ്ലോക്ക്ബസ്റ്റർ എടുത്ത നിർമ്മാതാവ് ഷെരീഫ് മുഹമ്മദിന്റെ ക്യൂബ്സ് എന്റർടെയ്ൻമെന്റാണ് ഈ ചിത്രം നിർമ്മിക്കുന്നത്. ഇവരുടെ സോഷ്യൽ മീഡിയ പേജിലാണ് ഹനാൻഷായെ സിനിമയിലേക്ക് സ്വാഗതം ചെയ്തുകൊണ്ടുളള പോസ്റ്റർ വന്നിരിക്കുന്നത്. പോൾ ജോർജ്ജാണ് കാട്ടാളൻ സംവിധാനം ചെയ്യുന്നത്. കാന്താര സിനിമയുടെ സംഗീത സംവിധായകൻ ബി അജനീഷ് ലോക്നാഥ് ചിത്രത്തിന് സംഗീതമൊരുക്കുന്നു.
വലിയ താരനിര തന്നെയാണ് പെപ്പെയുടെ പുതിയ ചിത്രത്തിൽ അണിനിരക്കുന്നത്. മാർക്കോ വില്ലൻ കബീർ ദുഹാൻ സിങും തെലുങ്ക് താരം സുനിലും ചിത്രത്തിൽ പ്രധാന റോളുകളിൽ എത്തും. സിദ്ദിഖ്, ജഗദീഷ്, രജിഷ വിജയൻ, ബേബി ജീൻ തുടങ്ങിയവരാണ് ചിത്രത്തിലെ മറ്റുതാരങ്ങൾ.
ചിറാപുഞ്ചി പാട്ടിന് പുറമെ കസവിനാൽ, ഇൻസാനിലെ, ഹാനിയ, ഓ കിനാക്കാലം, അജപ്പാമട, ആലപ്പുഴ മുല്ലക്കല് തുടങ്ങിയവയും ഹനാന്റെ വൈറൽ ഗാനങ്ങളാണ്. വ്ളോഗിലൂടെയും ഹനാന്ഷായും കുടുംബവും മലയാളികള്ക്ക് പരിചിതരാണ്. 2022 ൽ പുറത്തിറങ്ങിയ ‘പറയാതെ അറിയാതെ’ എന്ന കവർ ഗാനത്തിലൂടെയാണ് ഹനാൻ ശ്രദ്ധ നേടിയത്.