‘കാന്താര’ നായകന്‍ ഋഷഭ് ഷെട്ടി മലയാളത്തിലേക്ക്. മോഹന്‍ലാല്‍-ലിജോ ജോസ് പെല്ലിശേരി കോംമ്പോയില്‍ ഒരുങ്ങുന്ന ചിത്രം ‘മലൈകോട്ടൈ വാലിബനി’ല്‍ ഋഷഭ് ഷെട്ടിയും ഭാഗമാകും എന്ന റിപ്പോര്‍ട്ടുകളാണ് ഇപ്പോള്‍ വരുന്നത്. ജനുവരി 18ന് ആണ് ചിത്രത്തിന്റെ ഷൂട്ടിംഗ് രാജസ്ഥാനില്‍ ആരംഭിച്ചത്. രാജസ്ഥാനിലെ ജയ്‌സാല്‍മീറില്‍ ആണ് ചിത്രീകരണം നടക്കുന്നത്.
കമല്‍ ഹാസന്‍ ചിത്രത്തിന്റെ ഭാഗമായേക്കും എന്ന വാര്‍ത്തകള്‍ നേരത്തെ വന്നിരുന്നു. ഇതിന് പിന്നാലെയാണ് ഇപ്പോള്‍ ഋഷഭ് ഷെട്ടിയും ചിത്രത്തിന്റെ ഭാഗമാകും എന്ന വാര്‍ത്തകള്‍ വരുന്നത്. കാന്താര സിനിമയുടെ സംവിധായകനും നായകനുമായ ഋഷഭ് ഷെട്ടി ചിത്രത്തിലൂടെ ഏറെ പ്രശംസകള്‍ നേടിയിരുന്നു.
മലൈകോട്ടൈ വാലിബനില്‍ താരം വേഷമിടുകയാണെങ്കില്‍ ഋഷഭിന്റെ മലയാള അരങ്ങേറ്റ ചിത്രമാകും ഇത്. ചിത്രത്തില്‍ കാമിയോ റോളിലേക്ക് താരം പരിഗണിക്കുന്നുണ്ടെന്നാണ് പിങ്ക്‌വില്ല റിപ്പോര്‍ട്ട് ചെയ്യുന്നത്. എന്നാല്‍ ഇതിനെ കുറിച്ച് ഔദ്യോഗിക സ്ഥിരീകരണം ഒന്നും ഉണ്ടായിട്ടില്ല. മോഹന്‍ലാല്‍ ഗുസ്തിക്കാരനായാണ് മലൈകോട്ടൈ വാലിബനില്‍ വേഷമിടുക എന്നാണ് റിപ്പോര്‍ട്ടുകള്‍.
പിരീഡ് ഡ്രാമ ആയാണ് ചിത്രം ഒരുങ്ങുന്നതെന്നും റിപ്പോര്‍ട്ടുകളുണ്ട്. സൊണാലി കുല്‍ക്കര്‍ണി, ഹരീഷ് പേരടി, ഡാനിഷ് സെയ്ത് എന്നിവരാണ് ചിത്രത്തിലെ മറ്റ് അഭിനേതാക്കള്‍. ജോണ്‍ മേരി ക്രിയേറ്റിവ് ലിമിറ്റഡിനോടൊപ്പം മാക്സ് ലാബ് സിനിമാസ്, ആമേന്‍ മൂവി മോണാസ്റ്ററി, സെഞ്ച്വറി ഫിലിംസ് എന്നിവര്‍ ചേര്‍ന്നാണ് ഈ ചിത്രം നിര്‍മ്മിക്കുന്നത്.
