ഫെയ്‌സ്ബുക്ക് സ്ഥാപകന് മാര്‍ക്ക് സുക്കര്‍ബര്‍ഗിന് വ്യത്യസ്തമായ പിറന്നാള്‍ ആശംസകളുമായി നടന്‍ ഷറഫുദ്ദീന്‍. സുക്കര്‍ബര്‍ഗിന് എതിരെ വിമര്‍ശനങ്ങള്‍ ഉയരുന്ന സാഹചര്യത്തില്‍ ഷറഫുദ്ദീന്റെ പിറന്നാള്‍ ആശംസ പോസ്റ്റ് സോഷ്യല്‍ മീഡിയയില്‍ ചര്‍ച്ചയായിരിക്കുകയാണ്.
“”നിങ്ങളെയെല്ലാം ഞാന്‍ ഒന്നിപ്പിക്കാം എന്നും പറഞ്ഞു വന്നിട്ട് ഇപ്പൊ അല്‍ഗോരിതം വെച്ച് ഭിന്നിപ്പിക്കുന്ന ആശാന് പിറന്നാള്‍ ആശംസകള്‍!”” എന്നാണ് ഷറഫുദ്ദീന്റെ പോസ്റ്റ്. നിരവധി കമന്റുകളാണ് പോസ്റ്റിന് താഴെ എത്തിക്കൊണ്ടിരിക്കുന്നത്.
ഒരു നീതി ദേവത പ്രതിമ കൂടി അങ്ങോട്ട് റെഡി ആക്കണം മിഷ്ടര്‍, അല്‍ഗോരിതം വെച്ച് ഭിന്നിപ്പിക്കുക മാത്രമല്ല നിങ്ങള്‍ അറിയാതെ നിങ്ങളെക്കൊണ്ട് പോസ്റ്റും ചെയ്യിക്കും, പിന്നെ ചുമ്മാ കമന്റ് ഇടാന്‍ വരുന്ന സാധാരണ സൈക്കോ പാത്തെന്നു കരുതിയോ നിങ്ങള്‍ എന്നിങ്ങനെയുള്ള രസകരമായ കമന്റുകളാണ് വരുന്നത്.
ഇസ്രായേല്‍-പലസ്തീന് സംഘര്‍ഷത്തില്‍ പലസ്തീന് പിന്തുണയുമായി എത്തുന്ന ഫെയ്‌സ്ബുക്ക് പോസ്റ്റുകള്‍ക്ക് റീച്ച് കുറയ്ക്കുന്നതായും ആരോപണങ്ങള്‍ ഉണ്ടായിരുന്നു. ഇന്ത്യയില്‍ പൗരത്വ ഭേദഗതി ബില്ലിനും കാര്‍ഷിക ബില്ലിനുമെതിരെയുള്ള പ്രതിഷേധങ്ങളിലും കേന്ദ്രസര്‍ക്കാരിന് അനുകൂലമായി ഫെയ്‌സ്ബുക്ക് നിലപാട് എടുക്കുന്നെന്ന് വിമര്‍ശനങ്ങള്‍ ഉയര്‍ന്നിരുന്നു.