മയക്കു മരുന്നിനെതിരെ കേരള പൊലീസ് ഇട്ട ഫെയ്സ്ബുക്ക് പോസ്റ്റ് ഷെയര് ചെയ്ത് സംവിധായകന് ഒമര് ലുലു. ‘സമയം നല്ലത് ആകണമെങ്കില് സ്വയം വിചാരിക്കണം, നമുക്ക് മയക്കുമരുന്ന് ഉപേക്ഷിക്കാം’ എന്നാണ് പോസ്റ്റിലെ വാചകം. ഒമര് ലുലു സംവിധാനം ചെയ്ത് പുറത്തിറങ്ങിയ ‘നല്ല സമയം’ എന്ന ചിത്രത്തിന്റെ ടൈറ്റില് പോസ്റ്ററിന്റെ സമാന രീതിയിലാണ് കേരള പൊലീസിന്റെ പോസ്റ്റും ഡിസൈന് ചെയ്തിരിക്കുന്നത്.
ഒമര് ലുലു ചിത്രം ‘നല്ല സമയം’ തിയറ്ററുകളില് നിന്ന് പിന്വലിച്ചിരുന്നു. നല്ല സമയം തിയറ്ററില് നിന്ന് പിന്വലിക്കുന്നു. ഇനി ബാക്കി കാര്യങ്ങള് കോടതി വിധി അനുസരിച്ച്’ എന്നായിരുന്നു ഈ വിഷയത്തില് സംവിധായകന്റെ പ്രതികരണം.
”സിനിമ പിന്വലിക്കാന് പോകുകയാണ്. കോടതിയില് റിട്ട് ഫയല് ചെയ്തിട്ടുണ്ട്. വിധി വന്ന ശേഷം ഇനി ബാക്കി കാര്യങ്ങള് തീരുമാനിക്കും. ഇന്ന് സിനിമയുടെ പ്രദര്ശനം നേരത്തെ ചാര്ട്ട് ചെയ്തിട്ടുള്ളതുകൊണ്ട് അത് നടക്കും. ഇന്നു മുതല് പ്രദര്ശനമില്ല. വിതരണക്കാരെ വിളിച്ച് കാര്യങ്ങള് പറഞ്ഞിട്ടുണ്ട്. ഞങ്ങള്ക്ക് ഇത് നഷ്ടമാണ്. പക്ഷേ അത് കാര്യമാക്കുന്നില്ല. നമ്മള് കാരണം സമൂഹം വഴിതെറ്റുന്നു എന്നാണ് പറയുന്നത്. ഈ സിനിമയ്ക്കെതിരെ വരുന്ന ഇത്തരം ആരോപണങ്ങള് വിഷമിപ്പിക്കുന്നതാണ്.
യുവാക്കള്ക്ക് സിനിമ ഇഷ്ടമാകുന്നുണ്ട്. സിനിമയെ സിനിമയായി കാണാത്തവര്ക്കാണ് പ്രശ്നം. സിനിമ ആവിഷ്കാര സ്വാതന്ത്ര്യമാണെന്നല്ലേ പറയുന്നത്. പീഡന രംഗമുള്ള സിനിമകള് പീഡനത്തെ പ്രോല്സാഹിപ്പിക്കുന്നതാണോ..? തീര്ച്ചയായും ഇതിന് പിന്നില് ഗൂഢാലോചന ഉണ്ട്. ഇത്തരം രംഗങ്ങളുള്ള മറ്റ് പല സിനിമകളും ഇവിടെ ആരാധകരുടെ പിന്തുണയോടെ പ്രദര്ശിപ്പിക്കുന്നു.
ഒരു രാഷ്ട്രീയ പാര്ട്ടിയിലും ഉള്ള ആളല്ല ഞാന്. പലരും നിലനില്പ്പിന് വേണ്ടി രാഷ്ട്രീയം പറയുന്നു. ഞാന് പാര്ട്ടി നോക്കാതെ എല്ലാം തുറന്ന് പറയുന്നു. എല്ലാവരെയും സുഖിപ്പിച്ച് നില്ക്കുന്നവര്ക്കേ നിലനില്പ്പുള്ളൂ. ഇനി എന്റേതായി പുറത്തിറങ്ങാനിരിക്കുന്ന സിനിമകളുടെയും വിധി സമാനമായിരിക്കില്ലേ എന്ന് ആശങ്ക ഉണ്ട്.”-ഒമര് പറഞ്ഞു.
വെള്ളിയാഴ്ചയാണ് ഒമര് ലുലു സംവിധാനം ചെയ്ത ‘നല്ല സമയം’ തിയേറ്ററുകളിലെത്തിയത്. ഇര്ഷാദാണ് ചിത്രത്തില് നായകന്. നീന മധു, ഗായത്രി ശങ്കര്, നോറ ജോണ്സണ്, നന്ദന സഹദേവന്, സുവൈബത്തുല് ആസ്ലമിയ്യ എന്നീ പുതുമുഖങ്ങളാണ് നായികമാര്. ചിത്രത്തിന് എ സര്ട്ടിഫിക്കറ്റ് ആണ് സെന്സര്ബോര്ഡ് നല്കിയത്.