തന്റെ ജീവിതത്തില് നടന്ന കാര്യങ്ങളാണ് ആസിഫ് അലി ചിത്രം ‘ആഭ്യന്തര കുറ്റവാളി’യുടെ ഉള്ളടക്കമെന്ന് നടന് ബാല. സിനിമ കണ്ട് തന്റെ കണ്ണ് നിറഞ്ഞുപോയി. വിവാഹമോചന കേസില് എപ്പോഴും നഷ്ടം സംഭവിക്കുന്നത് പുരുഷന്മാര്ക്കാണെന്നും സ്ത്രീകള്ക്ക് നല്ല പണം ലഭിക്കുമെന്നാണ് ബാല പറയുന്നത്.
വിവാഹമോചനത്തിന്റെ പേരില് മക്കളെ അച്ഛന്മാരില് നിന്നും പിരിക്കുന്നത് ഒരിക്കലും ക്ഷമിക്കാന് ആകില്ലെന്നും നഷ്ടപരിഹാരം നല്കി തന്റെ കയ്യില് ഇനി ആകെ അവശേഷിക്കുന്നത് ഒരു വളയും കുറച്ച് മോതിരങ്ങളുമാണെന്നും ബാല വ്യക്തമാക്കി. നിലവിലെ ഭാര്യ കോകില അടക്കം, ബാല ഇതുവരെ 4 വിവഹം ചെയ്തിട്ടുണ്ട്. രണ്ടാം ഭാര്യയും ഗായികയുമായ അമൃതയെ ഉദ്ദേശിച്ചാണ് നടന്റെ പ്രതികരണം എന്നാണ് സോഷ്യല് മീഡിയയിലെ കമന്റുകള്.
ബാലയുടെ വാക്കുകള്:
സിനിമയുടെ കണ്ടന്റ് ഇഷ്ടപ്പെട്ടിട്ടാണ് സിനിമ കാണാന് വന്നത്. ജീവിതത്തില് നടന്ന കാര്യങ്ങള് സിനിമയില് കാണുമ്പോള് അറിയാതെ കണ്ണ് നിറഞ്ഞുപോയി. പക്ഷേ ഞാന് കണ്ട്രോള് ചെയ്തു. സിനിമ കണ്ട് കഴിഞ്ഞപ്പോള് ഒരു അമ്മ വന്ന് പറഞ്ഞു. എല്ലാ കാര്യങ്ങളും അറിയാം, മോന് തളര്ന്ന് പോകരുത് എന്ന്. ഇങ്ങനെ ഒരു കേസ് വന്നാല് ആണിന്റെ സമയവും ജോലിയും സുഹൃത്തുക്കളും പണവും കുടുംബവുമെല്ലാം പോകും. സമൂഹത്തില് അവന് വില്ലാനാകും.
എന്നാല് മറുവശത്ത് മാസാമാസം നല്ല പൈസ കിട്ടും. നല്ല വക്കീല് ഉണ്ടെങ്കില് എല്ലാ സ്വത്തും കൊണ്ടുപോകും. മതമോ ദൈവമോ നിയമോ ഒന്നും അച്ഛനെയും മക്കളെയും പിരിക്കാന് പാടില്ല. പെണ്ണ് വിചാരിച്ചാല് ആണിനെ നശിപ്പിക്കാന് പറ്റും. നിയമത്തില് സത്രീക്കും പുരുഷനും തുല്യാവകാശം ഇല്ല. ആണിന് തുല്യാവകാശം ഇല്ല. പെണ്ണിനാണ് അവകാശം കൂടുതല്. സ്വത്ത് എഴുതി വാങ്ങിയതിനെ കുറിച്ച് ചോദിച്ചാല്, ഇനി അങ്ങോട്ട് കൊടുക്കാന് തന്റെ കയ്യില് ഒന്നും ഇല്ല. ഒരു വളയും കുറച്ച് മോതിരങ്ങളുമേ ഉളളൂ, ബാല പറഞ്ഞു.