ഫ്രാന്‍സ് ഫുട്‌ബോള്‍ ടീം ക്യാപ്റ്റനും പിഎസ്ജി സൂപ്പര്‍ താരവുമായ കിലിയന്‍ എംബാപ്പെ 2023-24 സീസണിന് ശേഷം ലാ ലിഗ വമ്പന്‍മാരായ റയല്‍ മാഡ്രിഡില്‍ ചേരാന്‍ ഒരുങ്ങുന്നതായി റിപ്പോര്‍ട്ട്. വാര്‍ത്താ ഏജന്‍സിയായ റോയിട്ടേഴ്സാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്. പിഎസ്ജിയുമായി കരാര്‍ അവസാനിക്കുന്ന താരം റയല്‍ മാഡ്രിഡുമായി കരാര്‍ ധാരണയില്‍ എത്തി എന്നും താമസിയാതെ കരാര്‍ ഒപ്പിടുമെന്നും റിപ്പോര്‍ട്ടില്‍ പറയുന്നു.
കരാര്‍ അവസാനിക്കുന്നതോടെ പി എസ് ജി വിടും എന്ന് എംബപ്പെ വ്യക്തമാക്കിയിരുന്നു. അടുത്തയാഴ്ച താരം ക്ലബ് വിടാനുള്ള തീരുമാനം ഔദ്യോഗികമായി പ്രഖ്യാപിക്കുമെന്നാണ് പുറത്തുവരുന്ന വിവരം. താരമോ, ക്ലബ് അധികൃതരോ ഇതുമായി ബന്ധപ്പെട്ട് ഇതുവരെ പ്രതികരിച്ചിട്ടില്ല.
വന്‍ തുക മുടക്കി ക്ലബിലെത്തിച്ച എംബാപ്പെയ്ക്ക് പുതിയ കരാര്‍ നല്‍കാന്‍ പിഎസ്ജി പല വിധത്തിലും ശ്രമിച്ചിരുന്നു എങ്കിലും ഫലം ഉണ്ടായില്ല. ഇപ്പോള്‍ പി എസ് ജി അതിനുള്ള ശ്രമങ്ങള്‍ തന്നെ ഉപേക്ഷിച്ചിരിക്കുകയാണ്. എംബപ്പെ ക്ലബ് വിട്ടാല്‍ പകരം എ സി മിലാന്റെ റാഫേല്‍ ലിയാവോയെ ടീമിലേക്ക് എത്തിക്കാന്‍ പിഎസ്ജി ശ്രമിക്കുമെന്ന് റിപ്പോര്‍ട്ടുകള്‍ പറയുന്നു.
വര്‍ഷങ്ങളായി റയലിന്റെ റഡാറിലുള്ള താരമാണ് എംബാപ്പെ. റയലിലേക്ക് ചേക്കേറാനാണ് എംബാപ്പെയും വ്യക്തിപരമായി ആഗ്രഹിക്കുന്നത്. ഇപ്പോള്‍ തന്നെ ശക്തരായി മുന്നോട്ടു പോകുന്ന റയല്‍ മാഡ്രിഡില്‍ എംബപ്പെ കൂടെ എത്തിയാല്‍ അവരെ തടയുക എതിരാളികള്‍ക്ക് ഇരട്ടി ബുദ്ധിമുട്ടാകും.
