അഫ്രിക്കന്‍ കപ്പ് ഓഫ് നേഷന്‍സിന്റെ ക്വാര്‍ട്ടറില്‍ ഒന്നിനെതിരെ രണ്ട് ഗോളുകള്‍ക്ക് തോറ്റ മൊറാക്കോ താരങ്ങളെ ആശ്വസിപ്പിച്ച് ഈജിപ്തിന്റെ ലിവര്‍പൂള്‍ താരം മൊഹമ്മദ് സലാ. താരത്തിന്റെ മികവില്‍ മൊറാക്കോയെ തോല്‍പ്പിച്ച് ഈജിപ്ത് സെമിയില്‍ എത്തുകയും ചെയ്തു. രണ്ടു ഗോളുകള്‍ക്കും പിന്നില്‍ പ്രവര്‍ത്തിച്ചത് മൊഹമ്മദ് സലായായിരുന്നു.
ആദ്യപകുതിയില്‍ ഒരു ഗോളിന് പിന്നില്‍ പോയ ഈജിപ്ത് രണ്ടാം പകുതിയില്‍ സമനില പിടിക്കുകയും അധികസമയത്ത് ഗോള്‍ തിരിച്ചടിക്കുകയുമായിരുന്നു. ഒരു ഗോള്‍ നേടിയ സലാ അധിക സമയത്ത് മഹ്‌മൂദ് ട്രെസെഗെറ്റിന്റെ ഗോളിന് വഴിയൊരുക്കുകയും ചെയ്തു. കളിയുടെ തുടക്കത്തില്‍ തന്നെ സോഫിയാന്‍ ബൗഫലാണ് മൊറോക്കോയുടെ ഗോള്‍ നേടിയത്. പെനാല്‍റ്റിയിലൂടെയായിരുന്നു ഗോള്‍.
മത്സരത്തില്‍ എതിര്‍ ടീം താരങ്ങളെ ആശ്വസിപ്പിക്കുന്ന സലായുടെ ചിത്രമാണ് ഫുട്‌ബോള്‍ ആരാധകരുടെ ഹൃദയം കവര്‍ന്നത്. പി.എസ്.ജി താരം അഷ്റഫ് ഹക്കിമിയെ താരം ആശ്വസിപ്പിക്കുന്നതിന്റെ ചിത്രങ്ങള്‍ സോഷ്യല്‍ മീഡിയയില്‍ വൈറലായി. ടൂര്‍ണമെന്റില്‍ തകര്‍പ്പന്‍ പ്രകടനമാണ് മൊറാക്കോയും ഹക്കീമിയും നടത്തിയത്. സെമിയില്‍ കാമറൂണ്‍ ആണ് ഈജിപ്തിന്റെ എതിരാളികള്‍.
