ബംഗളൂരുവിനോട് ഒരു ഗോളിന് തോൽവി വഴങ്ങി കേരള ബ്ലാസ്റ്റേഴ്സ് തങ്ങളുടെ ആരാധകരെ നിരാശരാക്കിയിരിക്കുന്നു. തോൽവിയോടെ പ്ലേ ഓഫ് യാത്രയിൽ ബ്ലാസ്റ്റേഴ്സിന് തിരിച്ചടി കിട്ടിയിരിക്കുകയാണ്. ബാംഗ്ലൂർ ആകട്ടെ തങ്ങളെ ആദ്യ റൗണ്ട് മത്സരത്തിൽ പരാജയപ്പെടുത്തിയ ബ്ലാസ്റ്റേഴ്സിനെ പരാജയപ്പെടുത്തി പകയും വീട്ടി കഴിഞ്ഞു. ബെംഗളൂരുവിനായി സ്പാനിഷ് മിഡ്ഫീൽഡർ ജാവി ഹെർണാണ്ടസാണ് (89) വലകുലുക്കിയത്. 13ന് സ്വന്തം തട്ടകത്തിൽ കരുത്തരായ മോഹൻ ബഗാനെതിരെയാണ് ബ്ലാസ്റ്റേഴ്സിന്റെ അടുത്ത മത്സരം.
മത്സരം ആരംഭിക്കുന്നതിന് മുമ്പുതന്നെ സോഷ്യൽ മീഡിയയിൽ ഇരുടീമുകളും ഏറ്റുമുട്ടലുകൾ നടത്തിയിരുന്നു. ഒരുപക്ഷെ ബഗാൻ ടീമുകൾ തമ്മിലുള്ള പോരിനെക്കാൾ ആവേശത്തോടെയാണ് ആണ് ആരാധകർ ഈ പോരാട്ടം കാണുന്നതെന്ന് സോഷ്യൽ മീഡിയയിലെ പ്രതികരണങ്ങൾ കാണുമ്പോൾ വ്യക്തമായിരുന്നു. മത്സരത്തിൽ ആദ്യം മുതൽ ആധിപത്യം കാണിച്ച ബാംഗ്ലൂർ അർഹിച്ച ജയം തന്നെയാണ് സ്വന്തമാക്കിയതെന്ന് പറയാം.
മത്സരശേഷം ബ്ലാസ്റ്റേഴ്സിനെയും ആരാധകരായ മഞ്ഞപ്പടയെയും കളിയാക്കുന്ന ഒരു ബാനർ ബാംഗ്ലൂർ ഉയർത്തിയിരുന്നു. അക്ഷരാർത്ഥത്തിൽ ഉള്ള അവഹേളനം തന്നെയാണ് ബാംഗ്ലൂർ ബാനറിലൂടെ ഉദേശിച്ചത്. ഇത്തരത്തിൽ ഒരു തെറി പരാമർശം നിറഞ്ഞ ബാനർ ബാംഗ്ലൂർ ആരാധകർ ഉയർത്തി അത് ആഘോഷമാക്കുകയും ചെയ്തു. ഇതേ ബാനർ അടങ്ങിയ ചിത്രം ബാംഗ്ലൂർ ഗോൾകീപ്പർ ഗുർപ്രീത് പങ്കുവെക്കുകയും ചെയ്തു.
ട്രോളുകൾ ആകാം എന്നും ഇത്തരത്തിൽ ഉള്ള മോശം പദങ്ങൾ ബാനറായി കൊണ്ടുവന്നത് തെറ്റ് ആണെന്നുമാണ് ബ്ലാസ്റ്റേഴ്സ് ആരാധകർ പറയുന്നത്.