സൂപ്പർ താരം ലയണൽ മെസി ലോകകപ്പ് യോഗ്യത മത്സരങ്ങളിൽ അർജന്റീനയെ നയിക്കില്ല. പരിക്ക് കാരണമാണ് മെസിക്ക് മത്സരങ്ങൾ നഷ്ടമാകുന്നത്. കൂടാതെ ടീമിലെ പ്രധാന താരമായിരുന്ന എയ്ഞ്ചൽ ഡി മരിയയും വിരമിച്ചതോടെ യോഗ്യത മത്സരങ്ങളിൽ അർജന്റീന ബുദ്ധിമുട്ട് നേരിടേണ്ടി വരും എന്നാണ് ആരാധകരുടെ വിലയിരുത്തൽ. ടീമിനെ നയിക്കാൻ നിലവിലെ സാഹചര്യത്തിൽ ഏറ്റവും കൂടുതൽ സാധ്യത ഉള്ളത് റോഡ്രിഗോ ഡി പോളിനായിരിക്കും.
ക്യാപ്റ്റനായി നിക്കോളാസ് ഓട്ടമെന്റിയുടെ പേരും ഉയർന്ന് കേൾകുന്നുണ്ട്. എന്നാൽ ഏറ്റവും കൂടുതൽ സാധ്യത ഉള്ളത് ഡി പോളിനായിരിക്കും എന്നാണ് അർജന്റീനൻ ക്യാമ്പിൽ നിന്നും ലഭിക്കുന്ന വിവരങ്ങൾ. ലയണൽ മെസിയുടെ അഭാവത്തിൽ ഡി പോളിന് നായക സ്ഥാനം ലഭിക്കുന്നതിന് കുറിച്ച് താരം മാധ്യമങ്ങളോട് സംസാരിച്ചു.
റോഡ്രിഗോ ഡി പോൾ പറയുന്നത് ഇങ്ങനെ:
“ടീം നൽകുന്ന എന്ത് റോളും ഏറ്റെടുക്കാൻ തയ്യാറാണ് എന്നുള്ളത് നേരത്തെ തന്നെ ഞാൻ പറഞ്ഞിട്ടുള്ള കാര്യമാണ്. ഒരുപാട് വർഷമായി ഞാൻ ഇവിടെ തുടരുന്നു, ഇവിടുത്തെ പ്രധാനപ്പെട്ട താരമായി ഞാൻ മാറിയെന്ന് എനിക്ക് അനുഭവപ്പെടുന്നുണ്ട്. പക്ഷേ നമുക്കെല്ലാവർക്കും അറിയാവുന്നതാണ് ഈ ക്യാപ്റ്റന്റെ ആം ബാൻഡ് മെസ്സിയുടെതു മാത്രമാണ്. ബാക്കി ആര് അണിഞ്ഞാലും അത് സാഹചര്യവശാൽ മാത്രമാണ്. എപ്പോഴും ടീമിന്റെ ക്യാപ്റ്റൻ അത് ലയണൽ മെസ്സി തന്നെയാണ് ” ഡി പോൾ പറഞ്ഞു.
നായക സ്ഥാനത്തേക്ക് ക്യാപ്റ്റനായി ഗോൾ കീപ്പർ എമിലാനോ മാർട്ടിനെസിന്റെ പേരും ഉയർന്ന് കേൾകുന്നുണ്ട്. ഈ വർഷം നടന്ന കോപ്പ അമേരിക്കൻ ടൂർണമെന്റ് ഫൈനലിൽ കാലിനേറ്റ പരിക്കിലാണ് മെസി യോഗ്യത മത്സരങ്ങളിൽ നിന്നും സ്വയം മാറി നിൽക്കുന്നത്. എന്നാൽ പരിക്കിൽ നിന്നും മുക്തി നേടിയതോടെ അദ്ദേഹം തിരികെ വരുമോ ഇല്ലയോ എന്ന കാര്യത്തിൽ ആരാധകർക്ക് ആശങ്കയാണ്. അമേരിക്കൻ ക്ലബായ ഇന്റർ മിയാമി മത്സരങ്ങൾക്ക് വേണ്ടി അദ്ദേഹം ഇപ്പോൾ പരിശീലനം ആരംഭിച്ചിട്ടുണ്ട്. അടുത്ത മത്സരങ്ങളിൽ താരത്തിനെ കളിക്കളത്തിൽ കാണാൻ സാധിക്കും എന്നാണ് പ്രതീക്ഷിക്കപ്പെടുന്നത്.